طاجن مكرونة بالسجق

طاجن المكرونة بالسجق والخضروات 
المقادير:
مكرونة اقلام

للسجق:
ملعقة زيت (او اي مادة دهنية تحبوا تستخدموها بس الافضل تبقي زيت لان السجق بينزل دهنته لسه)
سجق بلدي مقطع صغير
فلفل اخضر مقطع مكعبات (لو حابين تضيفوا فلفل الوان ممكن او فلفل حامي)
طماطم متقشرة ومتشال اللب بتاعها ومتقطعه مكعبات (دي خطوة مهمة) 
بصلة متقطعه مكعبات 
فصين ثوم مهروسين
ملح وفلفل وبابريكا 

للصلصة:
ملعقة سمنة وزيها زيت
بصلة متقطعه مكعبات
ملعقة صلصة جاهزة
طماطم وفلفل مضروبين في الخلاط
فصين ثوم مهروسين
ملح وفلفل وبابريكا (ممكن اضافة نص ملعقة شطة لو حابينها تبقي سبايسي)
ملعقة سكر (عشان تشيل حموضة الطماطم من الصلصة)
ملعقة خل كبيرة

الطريقة:

للصلصة:
حننزل بالبصلة المتقطعه على حلة فيها ملعقة سمنة وملعقة زيت ولما تبدأ البصلة تاخد لون شفاف ننزل عليها بفصين الثوم المهروسين ولما الثوم ريحته تطلع ننزل عليهم بملعقتين الصلصة الجاهزة والملح والفلفل الاسود والبابريكا وملعقة السكر وملعقة الخل والطماطم والفلفل المضروبين في الخلاط (عدد من 2 ل 3 كوبايات) ونسيبهم على النار لحد ما يبداوا يغلوا ونوطي النار عليهم ونسيبهم لحد ما يتسبكوا 

للسجق:
ننزل بالسجق في طاسة سخنه فيها ملعقة زيت وبعد ما ياخد صدمة ولونه يتغير ويبدا يستوي ننزل عليه بالبصلة المتقطعه وفصين الثوم المهروسين ونقلبهم مع بعض ولما ريحه الثوم تطلع نحط التوابل عليهم الملح والفلفل والبابريكا ونقلبهم كويس وننزل عليهم بعدها بالطماطم والفلفل المتقطعين ونقلبهم كويس ونسيبهم يستوا مع بعض لمدة خمس دقايق مش اكتر ونعمل حساب انهم لسه حيكملوا سواهم في الفرن مع المكرونة

للمكرونة:
نسلق المكرونة نص سلقة ونصفيها من ميتها كويس ومنغسلهاش بعد السلق عشان تحتفظ بالنشا بتاعها ونقلبها مع  ثلاث معالق صلصة كبار 

تركيب الطاجن:
في صينية فرن غير لاصقة نحط الاول السجق بخلطته ونضغط عليه كويس وبعد كدة ننزل عليه بالمكرونة ونضغط عليها كويس لحد ما نحس ان المكرونة والسجق بقيت مكوناتهم متماسكة كويس مع بعض بعدها ننزل عليهم بباقي الصلصة اللى عملناهاونوزعها كويس على سطحهم واحنا بنضغط عليهم عشان نتاكد انهم بقوا متماسكين كويس مع بعض نغطي الصينية بفويل ونحطها في الفرن على حرارة 200 لمده من نص ساعه الى 45 دقيقة ولما نطلعها من الفرن نشيل الفويل ونقلبها في طبق حجمه مناسب للصينية بتاعتنا

وبالهناء والشفاء