الحواوشي الاسكندراني باسهل طريقه
0 المراجعات
الحواوشي هو عبارة عن لحمه مفرومة متبلة ومحطوطة جوا رغيف عيش او معمولة في عجين زي الحواوشي الاسكندراني..يقال ان اول من عملها هو جزار اسمه محمد حواوشي واللي بسببه اتعرف الحواوشي باسمه الحالي حتى الان.. اختلفت طرق عمله في القاهرة بيتعمل في ارغفه عيش سواء بلدي او شامي واللي بيعمله على الفحم او في الفرن ..وفي اسكندرية بيتعمل في عجينه وبيتخبز في الفرن..والنهاردة حنعمل الحواوشي الاسكندراني بعجينه خفيفه وسهله قوي
- المقادير للعجينه:
- ٣ كوب ونص دقيق
- كوب ونص ميه دافيه للعجن
- كيس خميرة فورية+معلقه سكر لتفعيل الخميرة
- كوب زبادي صغير
- ملح
- ٢ معلقه كبيرة زبدة
- لبن لدهن الوش
- سمسم (اختياري) لتزيين وش الحواوشي
- المقادير للحمه المفرومة:
- ٢ بصلة متوسطة
- ٣ طماطم متوسطين
- ٢ فلفل اخضر حامي او رومي
- توابل الحواوشي
- ملح وفلفل وبابريكا
- شطة(اختياري)
- ربع حزمة بقدونس
- نص كيلو لحمه مفرومة
- طريقة العجينه:
- ١_نحط الخميرة مع السكر ونص كوباية ميه دافيه مع بعض ونقلبهم كويس ونغطيها لمدة ١٠ دقايق لحد ما تتفاعل الخميرة وترتفع
- ٢_في بولة نحط الدقيق والملح والزبدة ونفرك الزبدة مع الدقيق كويس لحد ما تتوزع على الدقيق كله
- ٣_نحط الزبادي على الخميرة ونقلبهم كويس مع بعض ونحطهم على العجينه ونعجن كويس نزود الميه حبه بحبه لحد ما العجينه تلم معانت ونفضل نعجن فيها ١٠ دقايق على الاقل
- ٤_نسيبها في مكان دافي لحد ما تخمر
- طريقة اللحمه:
- ١_نحط الطماطم والبصل والبقدونس والتوابل مع بعض في الكبه ونخلطهم كويس قوي
- ٢_نحطهم على اللحمه المفرومة ونخلطهم كويس مع بعض ونسيبها تتشمع في التلاجه
- طريقة عمل الحواوشي:
- ١_ناخد جزء من العجينه ونفرده كويس بشك دايرة ونحط اللحمه في نصه ونسيب حوالين اللحمه نص سم على الاقل فاضي عشان نقفل الجزء التاني من العجينه على اللحمه وضفر الجوانب على بعضهم
- ٢_نخلص كميه اللحمه والعجينة مع بعض(الكمية دي عملت حوالي اربع ارغفه كبار) ونحطيهم في صينيه مدهونه زيت وندهن وشهم باللبن ونزينها بالسمسم..نفتح الوش بتاعها بالسكينه عشان متتنفخش العجينه وهيا بتستوي
- ٣_نحطها في فرن متسخن على حرارة ٢٠٠ لحد ما القعر بتاعها يتحمر ونفتح عليها الشواية لحد ما يحمر وشها برضه ويتقدم معاه سلطة طحينه وبالهناء والشفاء
