أسهل طريقة لعمل صوابع زينب

السلام عليكم ورحمة الله وبركاته …

كل سنه وانتو طيبين بمناسبة الشهر الكريم، شهر رمضان ،ويارب تعود الأيام عليكم بالخير جميعا يارب ..

مدام دخلت علي المقال ده ،فكده انت مهتم تعرف الطريقه، فأحب اقولك انك جيت في المكان الصح وان شاء الله تبقي خطوات سهله وبسيطه بأسهل مكونات ومن غير تكاليف كتير .

كلنا عارفين طبعا ان رمضان بيحب اللمه وبيحب الحلويات اكتر من الحوادق ،، وكمان لو كانت حلويات تتعمل بسرعه وتبقي النتيجة حلوة مش اي كلام وخلاص ،فكده هتبقي حاجه ذي الفل .. فعشان كده هنعمل مع بعض صوابع زينب ،حد عنده فكرة هي ليه تم تسميتها بصوابع زينب ؟؟ انا عن نفسي مش عندي فكره فلو حد عنده فكرة ممكن يقولنا بقي .

صوابع زينب من الحلويات السهله اللي كله بيحبها ،بتبقي خفيفه كده ومقرمشه ،مهما ناكل منها مش بنشبع..يلا كده نشوف هنعملها ازاي ..صلو علي النبي محمد الأول …

قبل أي حاجه وذي ما عرفتكم في طريقة البسبوسة ان انا بحب أحضر الشربات قبل ما ابدا في الحلوي عشان يرتاح كده ويبرد تماما ، خاصة اننا هنا هنقلي صوابع زينب فهي مش بتاخد وقت في الزيت  وهنطلعها علطول في الشربات ، فهنا لازم يكون الشربات جاهز معانا …

المقادير :-

١-كوب دقيق(طحين)

٢-كوب سميد 

٣-ملعقة صغيره خميرة فورية 

٤-٦ معالق  من الزيت 

٥-رشة صغيرة من الملح 

٦-رشه صغيرة من السكر 

٧-فانيليا (باودر أو سائله ) أنا أفضل السائله لأنها تعطي رائحة جميلة جداااا. 

٨-زيت للقلي يفضل زيت لم يكن له رائحة نفاذة حتي لا تؤثر علي الطعم 

طريقة التحضير :-

١- في بولة نضع كوب الدقيق + كوب السميد +الخميرة +رشة السكر +رشة الملح 

“ولو هتضيفي فانيليا باودر هتضيفيها علي هذه المكونات ”

٢-نخلط المكونات جيدا 

٣-نضيف علي الخليط المكونات السائلة 

٦- معالق من الزيت + الفانيليا اذا كانت سائله  

وقومي بالخلط 

٧-إضافة الماء الفاتر تدريجيا حتي تحصلي علي عجينة لينة سهله التشكيل .

٨- قومي بتشكيل العجين علي هيئة كرات صغيرة متساوية في  الحجم .

٩- باستخدام مبشرة أو صفاية الزيت تقومي بفرد الكور عليها حتي تأخذ الشكل (المربعات الصغيرة ) كما هو موضح بالصورة وتقومي بلفها حتي  الغلق.بمجرد تشكيل الكرات الي الصوابع يجب وضعها مباشرة في الزيت حتي لا تختمر، فتصبح كبيرة الحجم وتفقد رونقها والشكل المطلوب الذي نريده .

١٠- في مقلاة بها زيت يفضل أن يكون باردا تماما ،(عشان احنا عايزين لونها ذهبي غير محروق وفي نفس الوقت مستويه من جوه)  نقم بوضع صوابع زينب وعلي نار هادئه جدا  ، نقم بقليها حتي تأخذ اللون الذهبي الجميل .

١١- كل كمية تقومين بقليها تقومي برفعها من الزيت وعلي بولة الشربات فوراا  ، إذا كنت تحبيها طرية فعند وضعها في الشربات يمكنك تغطيتها بغطاء  فالبخار بذلك سوف يجعلها طرية أكثر، ،أما إذا كنت ترغبين في جعلها مقرمشه أكثر يمكنك الاستغناء عن هذه الخطوه. 

وهنا .. اذا كنت من الأشخاص  الذين لا يحبون السكر الزائد ،فمن الممكن تكتفي برش القليل من الشربات أو سكر البودرة عليها ،دون الانغماس في الشربات ،،فهذا يرجع لك .

١٢- نقم  بازالة صوابع زينب من الشربات ونضعها في مصفاة حتي نقم بتصفيتها  من الشربات الزائد .

١٣-في طبق التقديم نقم برص صوابع زينب بشكل جميل .

١٤-يمكنك اضافه القليل من جوز الهند اذا كنت تحبينه .

وبكده أصبحت صوابع زينب جاهزه معنا للاكل .

جربو  تعملوها، بجد طعمها تحفه جدااا

فهي طريقة سهله تجعلك تستغني عن شرائها من المحلات بأسعار قد تكون مكلفه او تكون ليست بالطعم الذي ترغبين فيه .