طريقة عمل تشيز كيك الكافيهات البارد في البيت بدون فرن

دليلك لعمل تشيز كيك الكافيهات في البيت: أسرار القوام المظبوط بدون فرن

سعر قطعة التشيز كيك في الكافيهات بقا مبالغ فيه جداً في الفترة الأخيرة، رغم إنها في الأصل حلوى بسيطة وممتعة وممكن أي ست بيت تعملها بأقل تكلفة وتطلع أحلى من الجاهزة بكتير. الميزة في التشيز كيك البارد إنه مبيحتاجش فرن ولا تعقيدات الكيك العادي اللي ممكن يهبط أو ينشف في المطبخ. في السطور الجاية، هشارك معاكي طريقة سهلة ومجربة لعمل تشيز كيك كريمي ومتماسك من أول مرة وبخطوات واضحة 

.المكونات اللي هنحتاجها

عشان تطلع معاكي صينية متوسطة ومظبوطة ولذيذة، جهزي المكونات دي وقسميها لثلاث طبقات أساسية:

1.الأساس (الطبقة الأولى): علبتين بسكوت سادة من أي نوع بتحبيه متوفر في السوبر ماركت، و3 معالق كبار زبدة دايبة.

2.قلب التشيز كيك (الطبقة الثانية): علبة جبنة كريمي (حوالي 200 جرام) تكون غير مملحة تماماً، ونصف كوب سكر بودرة منخول، وكوب كريم شانتيه مخفوق، ورشة فانيليا سائلة أو بودرة.

3.الوش (الطبقة الثالثة): صوص فراولة أو توت أزرق جاهز، وممكن تستبدليه بمربى فواكه مخففة بمعلقتين مية دافية.

خطوات التحضير بكل بساطة

 السر كله في تبريد كل طبقة وراحة البال أثناء العمل، اتبعي الخطوات دي بالترتيب الصحيح:

خطوة البسكوت المقرمش: اطحني البسكوت كويس جداً في الكبة لحد ما ينعم تماماً. انزلي عليه بالزبذة السايحة واخلطيهم بإيدك لحد ما البسكوت يبقى عامل زي الرمل المندي. افردي البسكوت في صينية (يفضل الصينية اللي بتتفتح من الجنب) واضغطي عليه بقوة بظهر كوباية عشان يتماسك ويكون ديسك متساوي، وحطي الصينية في الفريزر 10 دقائق

.تجهيز الكريمة الغنية: في بولة عميقة، اضربي المضرب الكهربائي مع الجبنة الكريمي والسكر البودرة والفانيليا لحد ما يدوبوا تماماً وميبقاش في أي تكتلات مزعجة. بعد كده، ضيفي الكريم شانتيه المخفوق مسبقاً للخليط، واقلبي بهدوء من تحت لفوق بمعلقة سيليكون لحد ما تحصلي على قوام ثقيل وناعم ومتجانس.

مرحلة الصبر والتبريد: طلعي صينية البسكوت من الفريزر، وصبي فوقها خليط الكريمة. ساوي الوش كويس بظهر المعلقة عشان ميبقاش حتة عالية وحتة واطية. دخلي الصينية الثلاجة وسيبيها مش أقل من 5 ساعات عشان طبقة الجبنة تتماسك تماماً وتسهل معاكي في التقطيع

.أسرار ونصائح ذهبية لضمان نجاح الوصفة

 تأكدي تماماً أن الجبنة الكريمي في درجة حرارة الغرفة قبل خفقها لتتجنبِ حدوث تكتلات صغيرة في طبقة الكريمة

.لا تستخدمي زبدة مالحة لأنها ستغير طعم قاعدة البسكوت تماماً وتؤثر على توازن الطعم الحلو.

يمكنكِ إضافة ملعقة صغيرة من الجيلاتين البودرة المذاب في ربع كوب ماء دافئ إذا كنتِ تخافين من عدم تماسك القوام في الصيف

.التقديم واللمسة الأخيرة

 قبل ما تقطعيها، فكي حواف الصينية براحة جداً باستخدام حافة سكينة رفيعة. وزعي صوص الفراولة أو التوت على الوش وافرديه بلطف شديد. عشان تقطعيها زي المحترفين في الكافيهات الفخمة، اغسلي السكينة بمية سخنة وامسحيها بمنديل قبل كل قطمة، بكده هتطلع معاكي كل قطعة حادة ونظيفة وشكلها يفتح النفس على السفرة. بالهنا والشفا