حولي كيكة الشيكولاتة العادية لحلا رائع بمنتهى البساطة
كيك شيكولاتة فاخر بأبسط طريقة و مكونات
نفسك في حاجة حلوة فاخرة من غير ما تصرفي كتير؟
عايزة حلو شيك تقدميه لضيوفك من غير ما تقفي كتير في المطبخ في الحر.!
النهاردة انا جيالك بوصفة سهلة و بسيطة و مش هتكلفك كتير 👌
عارفة كيكة الشيكولاتة اليومية اللي ولادك بقوا يزهقوا منها، هنعمل فيها تعديلات بسيطة هتحولها لحلا تحفة وفي منتهى الشياكة. 😋🥰
مقادير الكيك:
٢ كوب دقيق
ربع كوب كاكاو خام غير مُحلى
معلقة كبيرة بيكنج باودر
كوب سكر
كوب الا ربع زيت
٢ بيضة
فانيليا
كوب حليب
معلقة قهوة سريعة الذوبان)اختياري(
طريقة الكيك:
في وعاء هنضيف الدقيق و البيكنج باودر ونقلبهم
في الخلاط او بمضرب الكهربا او بالمضرب اليدوي هنضيف السكر و الزيت و الحليب و البيض والكاكاو و الفانيليا . اضربيهم كويس اوي مع بعض لحد ما يتجانسو كويس و يبقى الخليط لامع
نضيف الخليط على الدقيق و نقلب براحة في اتجاه واحد
نسكب خليط الكيك في صينية مقاس ٢٥ في ٣٥ مدهونة زيت و مفروشة ورق زبدة
تدخل فرن مسخن من قبل على درجة ١٨٠ لمدة عشر دقائق
تخرج من الفرن تبرد تمام و نسقيها بخليط التسقية
مقادير خليط التسقية:
كوب لبن ساقع
كوب مياه ساقعة
معلقة كبيرة لبن بودرة
معلقتين كبار سكر
معلقة صغيرة كريم شانتيه
الطريقة:
نضيف كل المكونات و نقلب بشكل مستمر حتى تختلط جيدا ثم نقوم بتصفية الخليط . و تسقية الكيك بالكامل.
يترك الكيك بعد التسقية في الثلاجة ليصبح رطبا و طريا.
>> خطوة طبقة الكريمة 😋
مقادير الكريمة :
ربع كوب كريم شانتيه خام
نص كوب ماية ساقعة جدا
معلقة كبيرة سكر
معلقة كبيرة كاكاو
معلقة قهوة سريعة الذوبان
الطريقة:
في وعاء نضيف الكريم شانتيه و الماية و السكر
نضرب الكريمة بالمضرب الكهربائي لحد ما تعملى و تعمل فوم عالي
نضيف عليها معلقة كاكاو لتعزيز اللون و معلقة القهوة سريعة الذوبان
نستمر في الضرب بالمضرب الكهربائي حتى يصبح لون الكريمة مائل للون الشيكولاتة
نفرد طبقة الكريمة على الكيكة بعد ما بردت و سقيناها بخليط التسقية
تدخل التلاجة نص ساعة عشان الكريمة تمسك نفسها
>> اخر طبقة تزيين الكيك بجناش الشيكولاتة ..
ربع كوب ماية مغلية .. معلقة كريم شانتيه صغيرة.. معلقة زيت .. نص كوب شيكولاتة مبشورة
تقليب مستمر حتى يتجانس و نحصل على جناش لامع
نتركه حتى يبرد ثم نفرده على طبقة الكريمة.
دخلي صينية الكيك في التلاجة ساعة عشان تسقع و تكون جاهزة للأكل.
تقطيع الكيك>>
استخدمي سكين طويل و قطعي الكيك بالحجم اللي تحبيه
متنسيش تمسحي السكين بمنديل بعد كل مرة استخدام.
و استمتعي بأحلى قطعة كيك شيكولاتة فاخرة من صنع ايديكي و بأقل التكاليف👌😋
و بكدة اكون قدمتلك بين ايديكي أسهل و أنجح طريقة للحصول على حلا رائع مناسب لضيوفك و اولادك و التجمعات العائلية الصيفية 🍰
بالهناء والشفاء.! ولا تنسي مشاركة الوصفة مع صديقاتك 🤝
💕إبهريهم بشطارتك💕
