سر طريقة عمل الحمام المحشي المظبوط خطوة بخطوة من غير ما يفرقع
سر عمل الحمام المحشي بالطريقة المصرية الأصيلة
طريقة عمل الحمام المحشي هي السر الأكبر الذي تبحث عنه كل سيدة ترغب في تقديم سفرة فاخرة في العزومات والمناسبات السعيدة. فبالرغم من أن الحمام المحشي يعتبر ملك الأكلات المصرية والعربية، إلا أن الكثيرين يخشون تحضيره في المنزل خوفًا من انفجار الحمام أثناء السلق أو خروج الحشو منه. في هذا المقال، سنكشف لكِ بالتفصيل أسرار الجدات وخلطات المطاعم السرية لتحضير حمام محشي بالأرز بمذاق لا يُقاوم، وبخطوات بسيطة تضمن لكِ نجاح الوصفة من المرة الأولى وبأسهل طريقة.
>> أولا ازاي اشتري الحمام:
- عند شراء الحمام اختاري محل الطيور اللي واثقة في نضافته وضميره عشان ميبقاش الحمام كبير في السن او فيه زفارة.
- اشتري الحمام البلدي الفلاحي اللي متربي في البيت بيكون لحمه طعمه أحلى.
- شوفي جلده من تحت الريش لو لقيتي فيه حبوب صغيرة ابعدي عنه تماما. لانه دة بيكون مرض جدري . غير صالح للاكل نهائي
>> ثانيا تنظيف الحمام:
- خلاص اشترينا الحمام و نضف من الريش و فتحنا بطنه و شيلنا كل الأحشاء اللي في بطنه.
- اول ما نروح البيت نبدأ في تنظيفه. بلاش تركنيه عشان ميعملش ريحة زفارة.
- هتجيبي فرد الحمام تحت ماية جارية تغسليه كويس من برة و تنظفيه من بواقي الريش .
- هتدخلي صباعين تحت الجلد تحت الحنفية و تخلي الماية هي اللي تفتح الجلد او بمعنى تاني تورقه.
- هتذيلي اي زلال بين الجلد و اللحم براحة و تغسلي بطن الحمام كويس لإزالة أي زفارة او أحشاء.
- في طبق كبير فيه كمية ماية تغطي الحمام هتضيفي عليها معلقة كبيرة ملح و سكر، مسمارين قرنفل، معلقة كبيرة دقيق، عصير لمون او برتقال مع القشر.
- تنقعي الحمام في المحلول دة مدة لا تقل عن ساعة. لان الحمام زفارته اكتر من باقي الطيور فبياخد وقت اطول في النقع.
- بعد ساعة هتشطفي الحمام مرة اخيرة من بطنه و برة وبين الجلد و اللحم بماية جارية مع ازالة اي شوائب من محلول النقع.
- نضع الحمام داخل مصفاه في وضع الوقوف واتركيه يصفي كل المايه لمدة نصف ساعة حتى يصبح جاف تماما.
>> تتبيلة الحمام:
- بصلة صغيرة لكل فرد حمام مبشورة ناعم جدا.
- يضاف عليها ملح و فلفل اسود و رشة بسيطة من القرفة و جوزة الطيب.
- ندعكهم كويس اوي مع بعض لحد ما تنزل ماية البصل.
- نتبل بيها الحمام من داخل البطن و بين الجلد واللحم وعلى جلد الحمام من برة.
- نترك الحمام في التتبيلة لمدة نصف ساعة على الاقل.
>> الحشو:
- لتحضير الحشو تأخد كل فرد حمام حفنة من الارز المصري بما يعادل كوب الا ربع.
- نغسل الأرز جيدا بالماء حتى نتخلص من النشا.
- يصفى الارز.
- في حلة على النار نضع كمية مناسبة من السمنة البلدي و نضيف عليها معلقة كبيرة من الزيت النباتي.
- نضيف في الحلة كبد و قوانص الحمام مقطعة قطع صغيرة و نشوحهم.
- نضيف الأرز وملح و رشة فلفل اسود و نشوح الارز مع الكبد والقوانص لمدة خمس دقائق.
- نضيف كوب من الماءو نترك الارز يستوي بنسبة ٦٠%
- نفضي الحشوة في طبق واسع لتبرد و تصبح جاهزة لحشو الحمام.
- نحشي الحمام من الرقبة وندخل الارز بين الجلد واللحم و في بطن الحمام .
- نقفل رجول الحمام ونقلب الجناح للخلف . و نزيل اي رز على جلد الحمام ليصبح شكله نظيف.
>>> تسوية الحمام:
- في حلة كبيرة على النار مناسبة لحجم الحمام.
- نضع فيها مياه سخنة و طماطم و بصل و عود قرفة وقرنفل مسمار و حبهان و مستكة و فلفل اسود حب و ملح و رشة سكر.
- بعد الغليان نضع الحمام في الماية على ضهره.
- اول ربع ساعة على نار وسط، بعد كدة تهدي النار لمدة تلت ساعة.
- خرجي الحمام على مصفاه لحد ما يبرد تماما.
- ادهني الحمام بخليط من اللبن و الملح و الفلفل.
- حمري الحمام في سمن بلدي مع زيت مع التقليب على كل جانب حتى الحصول على لون شهي.
- خرجي الحمام على مصفاه للتخلص من اي دهون زائدة نتيجة التحمير.
>>> أسرار و تكات و نصائح ذهبية <<<
- الحمام العجوز كبير في السن لا يصلح للحشو لانه بياخد وقت كتير في التسوية.
- الحمام اللي متربي في البيت بيكون لحمه طعمه احلى بكتير و كمان بيستوي بسرعة.
- تتبيلة الحمام بالبصل والملح والفلفل بتخلي اللحم نفسه طري و طعمه جميل جدا.
- بلاش تحشي الحمام بزيادة اوي و تكبسيه عشان ميفرقعش منك او الارز يكون ني.
- ادهني الحمام باللبن قبل التحمير دة بيديله لون دهبي جميل.
- رشي على الحمام شوية خضرة عند التقديم بيديله شكل شهي و جميل.
في النهاية، فإن سر نجاح طريقة عمل الحمام المحشي لا يحتاج إلى مهارات معقدة، بل يكمن في اتباع الخطوات الصحيحة والالتزام بأسرار الحشو والسلق التي شاركناها معكِ في هذا الدليل. الآن، أصبح بإمكانكِ إبهار عائلتكِ وضيوفكِ في العزومات بـ حمام محشي ذهبي ومقرمش بمذاق يفوق أشهر المطاعم وبطريقة آمنة ومضمونة. جربي الوصفة اليوم، ولا تترددي في مشاركتنا تجربتكِ أو طرح أي سؤال في التعليقات أسفل المقال، وتابعينا دائمًا لاكتشاف المزيد من أسرار الطبخ العربي الأصيل.
💕ابهريهم بشطارتك💕
