طريقه عمل الكاسترد في المنزل

 

---

《طريقه عمل الكاسترد في المنزل 》

الكاسترد من الحلويات اللي بحبها جدا،لانها سهله وسريعه ومش محتاجه مكونات كتير، وكمان طعمها خفيف وكريمي وينفع يتاكل لوحدو او نستخدمه في حشوات الحلويات، ولو نفسك تعملي كاسترد في البيت بطعم حلو وقوامه مظبوط من غير تعقيد، تعالى اقولك الطريقه خطوه بخطوه

●《المكونات 》

(1)- 4 اكواب لبن كامل الدسم

(2)- 4 معالق كبيره بودره كاسترد 

(3)- 4 معالق كبيره سكر، او حسب رغبتك

(4)- نصف معلقه صغيره فانيليا 

(5)- معلقه صغيره زبده ، ودي اختياري لكنها بتدي الكاسترد طعم غني وقوامه ناعم 

●《طريقه التحضير 》

في البداية ناخد حوالي نصف كوب لبن من اللبن البارد ونحطه في طبق او بوله صغيره، ونضيف عليه بودره الكاسترد والسكر. ونقلب المكونات كويس جدا بالمضرب اليدوي لحد ما بودره الكاسترد تذوب تماما ومفيش اي تكتلات

بعد كده نحط باقي كميه اللبن في حله على نار متوسطه ونسيبه يسخن،لكن مش لازم يغلي. اول ما اللبن يبقى دافي ، ناخد خليط الكاستر اللى حضرناه ونضيفه تدريجيا على اللبن مع التقليب المستمر 

وهنا اهم حاجه في الوصفه انك تفضلي تقلي بإستمرار، خصوصا وانتي على النار عشان الكاسترد مايمسكش في قاع الحله وميعملش تكتلات بعد كام دقيقه هتلاحظي ان الخليط بدأ يتقل تدريجيا ويبقى قوامه كريمي وناعم

لما  توصلي للقوام اللي يعجبك ، ارفعي الحله من على النار وضيفي الفانيليا وقلبي كويس . ولو حابه يكون الكاسترد أغنى وأنعم، ممكن تضيفي معلقه صغيره من الزبده وتقليبها لحد ما تذوب تماما .

دلوقتي الكاسترد جاهز، وممكن تقدميه وهو دافي او تسيبيه يبرد وتحطيه في الثلاجه لو بتحبيه بارد،ولو هتسبيه يبرد ، يفضل يغطي سطح الكاسترد مباشره بقطعه من ورق التغليف الغذائي عشان مايتكونش وش ناشف على السطح .

●《افكار للتقديم 》 

ممكن تقدمي الكاسترد في الأطباق صغيره وتزينيه برشه قرفه او جوزه الهند والمكسرات مجروشه وممكن كمان تضيفي عليه قطعه فاكهة زي الموز او الفراوله، وهيطلع معاكي حلو وخفيف ولذيذ جدا.

ولو بتحبي الحلويات اللي فيها طبقات، تقدري تستخدمي الكاسترد كحشوه بين البسكوت او الكيك،وممكن تعملي طبقات من البسكوت والكاسترد والفواكه وتدخليها الثلاجه شويه وهتكون حلوى سهله وشكلها جميل جدا.

 ●《 نصائح مهمه لنجاح الكاسترد》

لو لقيتي الكاسترد خفيف شويه، ممكن ترجعيه على نار هاديه مع التقليب المستمر لحد ما يتقل. ولو طلع تقيل أكثر من اللزم ممكن تضيفي له شويه لبن دافي وتقلبيه لحد ما توصلي للقوام المناسب.

وأهم نصيحه هي انك ماتسبيش الكاسترد على النار من غير تقليب ، لان التقليب المستمر هو سر القوام الناعم ومنع التكتلات . كمان يفضل استخدام لبن كامل الدسم عشان تحصلي على طعم كريمي الذ 

وبكده يكون عندك كاسترد بيتي بسيط وسريع ومناسب جدا للتحليه بعد الغداء او العزومات،ومن غير ما تحتاجي تشتري حلويات جاهزه. ((جربوها وقولولي رائيكم ))