طريقه عمل الكوكيز شوكولاتة في البيت

《طريقه عمل الكوكيز في البيت بطريقه سهله》

لو بتحبي الحلويات السهله اللى ممكن تتعمل في البيت من غير مجهود كبير فالكويز هي واحده من احلى الوصفات اللى ممكن تجربيها. ريحتها خطيره وهي بتتخبز وطعمها بيكون احلى بكتير وهي لسه دافيه مع كوب الشاي او القهوه او حتى كوب لبن الأطفال. والجميل في الكوكيز انها مش محتاجه مكونات غريبه ومعقده، ومن شويه مكونات بسيطه موجوده غالبا في المطبخ، تقدري تعملي كوكيز طريه من جوه ومقرمشه من برا وممكن كمان تضيفي لها شوكلاته او مكسرات حسب ذوقك. يلا بينا على الوصفه

●((مكونات الكوكيز))

1_(2 كوب ونصف من الدقيق)

2_(نصف كوب من الزبده الطريه)

3_(نصف كوب من السكر البني لو مش متوفر بتستخدم السكر العادي)

4_(كوب الا ربع من السكر العادي)

5_(بيضه واحده)

6_(معلقه صغيره من الفانيليا)

7_(نصف معلقه صغيره من البيكنج صودا)

8_(رشه صغيره من الملح)

9_(كوب من قطع شوكلاته او تشوكلت شيبس )

●((طريقه التحضير الكوكيز))

في البدايه، شغلي الفرن عبى درجه حراره ١٨٠درجه مئويه وسيبيه يسخن بعد كد جهزي صينيه الخبز وحطي فيها ورق زبده عشان الكوكيز ماتلزقش في الصينيه

في طبق مناسب حطي الزبده الطريه مع السكر الابيض والسكر البني وابدائي اخلطي المكونات كويس لحد ما الخليط يبقى ناعم ومتجانس. مش لازم تستخدمي المضرب الكهربائي، ممكن تعملي الخطوه دي بالمضرب اليدوي او بمعلقه خشب عادي.

بعد كد ضيفي البيضه والفانيليا  واخلطيهم كويس جدا ، لحد ما كل المكونات تتجانس مع بعض. وفي طبق تاني اخلطي الدقيق مع البيكنج صودا ورشه ملح وبعدها ضيفي المكونات الجافه دي بتدريج على خليط الزبدة والسكر وقلبي بهدوء لحد ما تتكون معاكي عجينه الكوكيز متماسكه.

هنا بقا أضيف قطع الشوكولاته او الشوكلت شيبس وقلبها في الخليط ولو بتحبي المكسرات ممكن تضيفي شويه بندق أو لوز او عين جمل مجروش. بعد ما تجهزي العجينه خدي منها كميات صغيره وشكلها على هيئه كرات وحطيها في الصينيه مع ترك المسافه بين كل واحده والتانيه لان الكوكيز بتفرد أثناء الخبز

دخلي الصينيه الفرن لمده تقريبا من 10و12 دقيقه . اهن حاجه ماتسيبهاش لحد ما تتحمر زياده لان الكوكيز ممكن تبان طريه وهي سخنه لاكنها بتتماسك لما تبرد.

بعد ما تطلعيها من الفرن سيبي الكوكيز في الصينيه حوالي ٥ دقايق وبعدها انقليها على شبكه او طبق واسع عشان تبرد. 

《أسرار نجاح الكوكيز》 

من أهم الحجات اللي بتفرق في نتيجه الكوكيز إن الزبده تكون طريه ومش سايحه. كمان يفضل عدك الإفراط في تقليب العجينه بعد إضافه الدقيق،لان التقليب الكتير ممكن يخلي الكوكيز شديده بدل ما تكون هشه وطريه ولو انتي بتحبي تعملي الكوكيز طريه من جوه ،ماتذوديش وقت خبرها ف الفرن عن اللازم.

وممكن كمان تحتفظي بعجينة الكوكيز في الثلاجه  لفتره قصيره قبل الخبز ، وده بيساعد على حصول كوكيز متماسكه وطعمها حلو 

وفي النهايه الكوكيز من الوصفات التستاهل التجربه، لانها سهله ومكوناتها بسيطه ومناسبه للفطار والسناكس او كتحليه خفيفه بعد الأكل، وغالبنا هتعجب ك أفراد العيله خصوص لو قدمتيها وهي لسه دافيه ومعاها كوب لبن او مشروبك المفضل. 

(جربوها وقولولي رائيكم)