طريقه عمل المكرونه وايت صوص بالفراخ

《طريقه عمل المكرونه وايت صوص بالفراخ》

لو بتحبي المكرونه الكريمي اللي بتكون بصوص ابيض ناعم وطعمها غني، فالمكرونه بالوايت صوص والفراخ من أسهل والذ الوصفات اللي ممكن تعمليها في البيت. واجمل ما فيها انها مش محتاجه مكونات غريبه او صعبه، وبتعمل في وقت قليل وبتكون وجبه كامله مشبعه.

●《المكونات》

1_(نصف كيلو مكرونه ويفضل النوع التحبيه سواء قلم او اسباجتي)

2_(نصف كيلو صدور فراخ مقطعه شرايح او مكعبات صغيره)

3_(اتنين معلقه زبده كبيره)

4_(معلقه كبيره زيت)

5_(اتنين معلقه كبيره دقيق)

6_(اتنين كوب لبن)

7_(نصف كوب كريمه طبخ ويمكن الاستغناء عنها لو مش متوفر)

8_(اتنين فص توم مفروم)

9_(نصف كوب جبنه موتزاريلا او جبنه بارميزان حسب المتوفر) 

10_(ملح حسب الرغبه)

11_(نص معلقه صغيره فلفل اسود)

12_(رشه بسيطه من البابريك ورشه من البصل البودر)

13_(رشه صغيره من الزعتر )

●《طريقه تحضير المكرونه وايت صوص بالفراخ》

في البدايه هنحط حله كبيره فيها كميه مناسبه من المياه على النار،ونضيف رشه ملح ونسيب المياه لحد ما تغلي. وبعد كده هنحط المكرونه ونقلبها من وقت للتاني عشان متلزقش في بعضها 

 نسوي المكرونه لحد ما تكون طريه ولكن مش زياده عن اللازم، وبعدها نصفيها ونسبها على جنب. ويفضل منغسلش المكرونه بالمياه البارده، لان النشا اللي عليها بيساعد الصوص انه يمسك فيها بشكل احسن

●《تحضير الفراخ 》

نجيب طاسه واسعه ونحط فيها معلقه زيت مع معلقه الزبده وبعد ماتسخن نضيف قطع الفراخ 

نتبل الفراخ بالملح والفلفل الأسود والبابريكا، ونقلبها كويس على النار متوسطه لحد ما تاخد اللون الذهبي وتستوي من الداخل. في الاخر هنضيف الثوم المفروم ونقلبها مع الفراخ لمده دقيقه تقريبا، بس خلي بالك متسبيش الثوم وقت طويل على النار عشان ميتحرقش ويغير طعم الوصفه.

بعد ما الفراخ تستوي نطلعها في طبق ونسيبها على جنب مؤقتا .

●《تحضير الوايت صوص》

في نفس الطاسه نعمل فيها الوايت صوص عشان ناخد كل النكهة الموجوده من الفراخ 

نحط معلقه زبده، وبعد ما تسيح نضيف الدقيق ونقلبه كويس لمده دقيقه او دقيقتين. بعد كده نبدأ نضيف اللبن تدريجيا مع التقليب المستمر بالمضرب اليدوي . والخطوط دي مهمه جدا عشان الصوص ناعم من غير تكتلات .

نستمر في التقليب على النار متوسطه لحد ما الصوص يبدأ يتقل ويكون قوامه كريمي. بعدها نضيف كريمه الطبخ لو متوفره، ونحط الجبنه ونقلب لحد ما توصلي للدوام اللي تحبيه

بعد ما الوايت صوص يجهز نرجع نحط الفراخ في الطاسه ونقلبها مع الصوص وبعدها نضيف المكرونه نقلب كل المكونات مع بعض بهدوء لحد ما الصوص يغطي المكرونه والفراخ بالكامل لو بتحبي الجبنه ممكن تضيفي جنبه موتزاريلا في الاخر وتسيبيها دقيقه على نار هاديه لحد ما تسيح. 

 ●《شويه نصايح تخليها احلى 》

اهم حاجه متزوديش الدقيق، لان كميه كبيره منه ممكن تخلي الصوص تقيل جدا . ولو بتحبي طعم الفراخ يكون أقوى، ممكن تتبليها قبل التسويه بوقت بسيط بالملح والفلفل والبابريكا ورشه ثوم بودر.وتقدري كمان تضيفي مشروم شرايح مع الفراخ او ذره وفلفل الوان لو تحبي تنوعي في الوصفه.

 وفي النهايه قدمي المكرونه وهي سخنه،وممكن تزيني الوش برشه جبنه براميزان او بقدونس مفروم. هتكون وجبه بسيطه وسريعة ومناسبه للغدا والعشا، وبألف هنا.. بحبكم