أشهى 3 وصفات دجاج لذيذة وسريعة التحضير تناسب كل الأذواق

أشهى 3 وصفات دجاج لذيذة وسريعة التحضير تناسب كل الأذواق كاساديا الفراخ 😋 و كانتون الدجاج 🧡 و شيش طاووق سبايسي  😍🔥

الطريقه الاولى 👇🫰

كاساديا الفراخ 😋

المقادير:

 • نص كيلو صدور فراخ متقطعة شرايح رفيعة

 • معلقة كبيرة من: بصل بودر، توم بودر، بابريكا

 • معلقة صغيرة من: زعتر، بهارات فراخ، كمون، زنجبيل، فلفل أسود، ملح

 • نص معلقة صغيرة قرفة

 • معلقة صغيرة خل

 • 3 فصوص توم مفروم

 • فلفل ألوان مكعبات

 • بصل مكعبات صغيرة

 • جبنة موتزاريلا أو شيدر

 • عيش تورتيلا أو عيش صاج (السوري)

طريقة التحضير:

 1. تتبيل الفراخ:

نحط كل التوابل مع الخل على الفراخ ونسيبها تتتبل ساعة.

 2. تسوية الفراخ:

في طاسة سخنة، نحط 2 معلقة زيت، ننزل بالتوم يدبل بس، ونضيف الفراخ.

نخليها تاخد وش، وبعدين نقلبها على الناحية التانية، من غير ما نقلب كتير علشان متفقدش عصارتها.

 3. الخضار:

نركن الفراخ على جنب الطاسة أو نرفعها، ونشوح البصل، ولما يدبل نضيف الفلفل الألوان.

نقلب كله مع بعض، ونرش رشة صغيرة ملح وفلفل.

 4. التجميع:

نحط طاسة تانية على نار هادية، ونفرد فيها عيش التورتيلا، نرش عليه طبقة جبنة،

نحط حشوة الفراخ والخضار، ونغطيها بطبقة تانية من الجبنة، ونقفل بعيش تاني.

نقلب الكاساديا على الناحية التانية تاخد لون حلو، ونقدمها.

بالهنا والشفا ♥️

الطريقه الثانيه 🫰 👇 

كانتون الدجاج 🧡

المقادير:

للفراخ:

 • صدور فراخ متقطعة مكعبات

 • دقيق + بيض مخفوق مع شوية حليب + بقسماط

 • رشة ملح وفلفل

 • بهارات فراخ

 • 1/4 كوب خل

 • 1/4 كوب صويا صوص (لو تقيلة، استخدمي معلقة كبيرة بس)

 • 1 كوب مية + 1 معلقة كبيرة نشا + 2 معلقة كبيرة سكر

 • 1/4 كوب كاتشب

 • نص معلقة توم مفروم

 • مكعبات بصل

 • مكعبات فلفل ألوان + فلفل أخضر

 • مكعبات جزر

للنودلز (أو المكرونة):

 • مكرونة فوتشيني أو سباجيتي أو قلم (مسلوقة)

 • 1/2 كوب من مية سلق المكرونة + 1 معلقة صغيرة نشا

 • 1/4 كوب صويا صوص (أو معلقة كبيرة لو تقيلة)

 • 1 معلقة كبيرة كاتشب

 • نص معلقة توم مفروم

 • شرايح جزر

 • شرايح فلفل ألوان وأخضر

 • رشة سمسم للتقديم

طريقة التحضير:

الفراخ:

 1. تبّلي مكعبات الفراخ بملح وفلفل وبهارات فراخ وسيبيها ساعة.

 2. مرّري الفراخ في دقيق، بعدين بيض بالحليب، وبعد كده بقسماط.

 3. اقليها في زيت سخن لحد ما تاخد لون دهبي حلو، وطلعيها على مناديل تمتص الزيت.

 4. في حلة، شوّحي البصل، الفلفل، والجزر في شوية زيت.

 5. ضيفي الخل، الكاتشب، التوم، الصويا صوص، وكوب المية اللي عليه نشا وسكر، وقلّبي.

 6. لما الصوص يتقل، ضيفي الفراخ المقلية، وقلّبيهم على نار هادية ٥ دقايق علشان تتشرب الطعم.

المكرونة:

 1. شوّحي شرايح الجزر والفلفل في شوية زيت.

 2. ضيفي الكاتشب، الصويا صوص، التوم، ومية سلق المكرونة اللي عليها نشا.

 3. أول ما الصوص يتقل، نزّلي بالمكرونة وقلّبي لحد ما تتغلف كويس وتاخد اللون والطعم.

للتقديم:

اغرفي نص الطبق نودلز، والنص التاني فراخ سويت آند ساور، ورشّي شوية سمسم على الوش زي المطاعم بالظبط.

بالهنا والشفا ♥️

الطريقه الثالثه 👇 🫰 

شيش طاووق سبايسي  😍🔥

المقادير:

 • 1/2 كيلو وراك او صدور فراخ متقطعة مكعبات

 • 1 فلفل أحمر رومي متقطع مكعبات

 • 1 فلفل أصفر رومي متقطع مكعبات

 • 1 فلفل أخضر رومي متقطع مكعبات

 • 1 بصلة متقطعة مكعبات

 • عصيان شيش خشب (منقوعة في ميه قبل الاستخدام)

لتتبيلة الشيش:

 • 1/2 كوب زبادي

 • 2 معلقة كبيرة كاتشب

 • 1 معلقة كبيرة صلصة طماطم

 • 1 معلقة صغيرة بابريكا

 • 1/2 معلقة صغيرة شطة

 • 1 معلقة صغيرة توم بودرة

 • 1 معلقة صغيرة بصل بودرة

 • 2 معلقة كبيرة زيت

 • رشة ملح وفلفل

طريقة التحضير:

 1. نخلط كل مكونات التتبيلة كويس جدًا، وننقع فيها الفراخ لمدة من 2 لـ 4 ساعات (ولو باتت أحسن).

 2. نبدأ نحط على العصاية: قطعة فراخ – فلفل – بصل – فراخ، ونكرر.

 3. نسخن طاسة تيفال أو جريل، وندهنها نقطة زيت، ونشوي الشيش على الجنبين لحد ما يتحمر ويتشوي من كل النواحي.

 4. ممكن كمان ندخله الفرن على درجة حرارة 200 لمدة 20 دقيقة، ونشغّل الشواية آخر 5 دقايق.

بالهنا والشفا ♥️