صوصات وكريمات جميلة ولذيذة

أنواع الصوصات والكريمات

 

(صوص المشروم )

 

المكونات:

كوبين مرق (شوربة)

نصف كوب دقيق

نصف كوب مشروم شرائح

نصف كوب بصل مفروم

نصف كوب زبده

 

الخطوات:-

- نخلط الدقيق مع الشوربة فى حلة على النار لحد ما الدقيق يدوب 

وبعدين نضيف المشروم والبصل والزبدة ونقلب لحد ماالصوص يتقل ولونه يبقى بنى.

- يقدم مع الستيك والباستا أو البرجر حسب الرغبة.

 

(صوص الشيدر) 

 

المكونات:

- معلقتين كبار زبدة

- معلقتين كبار دقيق

- كوب حليب كامل الدسم

- كوب ونصف جبنة شيدر مبشوره

- رشة ملح

- معلقة فلفل أحمر مفروم (اختياري)

 

طريقة التحضير:

 

- في حلة على النار ندوب الزبدة ونضيف الدقيق ونقلب كويس لحد ما المكونات تتجانس وبعدين نضيف الحليب ونسيبه لحدما يغلى والخليط يتقل.

- نطفي النار وننزل بالجبنة الشيدر المبشورة بسرعة مع التحريك المستمر ونضيف الملح والفلفل الاحمر الحار.

 

(مايونيز بدون بيض )

 

المكونات:

-كوب ونصف زيت نباتي

-كوب حليب

-ملعقة كبيرة خل

-ملعقة كبيرة عصير ليمون

-ملح وفلفل أسود

-نصف ملعقة صغيرة مسطردة (خردل)

 

طريقة التحضير:

 

في الخلاط الكهربائي نضيف كل المكونات ماعدا الزيت ونضربهم كويس وبعدين نضيف الزيت خيط رفيع بالتدريج لحد مانحصل على القوام المطلوب، وممكن نضيف جبنة كريمي أو مثلثات للحصول علي قوام أتقل.

(الكاتشب الجاهز)

 

المكونات:

-8 حبات طماطم

-معلقة كبيرة صلصة (معجون طماطم)

-نصف كوب ماء

-ربع كوب خل ابيض

-3 او 4 معلقة كبيرة سكر

-ربع معلقة صغيرة ملح

-ربع معلقة صغيرة قرفة

-2 عود قرنفل

-ربع ملعقة صغيرة ثوم بودرة

-ربع ملعقة صغيرة بصل بودر

-ملعقة صغيرة هريسة شطة ( إختيارى)

 

طريقة التحضير:

 

- نجيب الطماطم ونشيل الراس ونفتحها بالسكينة من تحت علامه زائد (+).

- في حلة على النار فيها ماء مغلى نحط الطماطم لمدة دقيقة ونصف ونطلعها على ماء مثلج ونقشرها ونضربها في الخلاط بدون ماء وبعدين نصفيها كويس.

- في حلة نضيف كوب وثلث من عصير الطماطم ومعجون الطماطم أو الصلصة ونصف كوب ماء وخل وسكر وملح وقرفةوقرنفل وثوم بودر وبصل البودر ونقلب المكونات ونرفعها على نار عالية تاخد غلوة وبعدين نهدي النار خالص ونسيبها حوالي ساعة لحد ما تستوي.

نجيب برطمان ونصب فيه الكاتشب ولما يبرد نحفظه في الثلاجة.

 

 

 (طريقتين لعمل صلصة البيتزا) 

 

الطريقة الأولى 1️⃣

 

المقادير:

-2 معلقة كبيرة زيت

-4 حبات طماطم مقطعة مكعبات

-5 معلقة كبيرة صلصة (معجون طماطم)

-كوب ونصف ماء مقسم

-فصين ثوم

-معلقة كبيرة سكر

-معلقة صغيرة ملح

-معلقة كبيرة زعتر

-رشة بابريكا ورشة كمون ناعم

-معلقة صغيرة اوريجانو (اختياري)

-ربع معلقة صغيرة فلفل اسود

-ملعقة كبيرة زيت

 

طريقة التحضير:

في الخلاط الكهربائي نضيف كل المكونات ونضربها كويس لحد ما الخليط ينعم.

في حلة على النار نضيف الخليط مع نصف كوب الماء ونقلب كويس ونغطيه 

ونسيبه ياخد غلوتين على النار لحد ما يتسبك وبعدين نرفعه عن النار ونسيبه يبرد ونحطه في برطمان زجاجي وممكن نحفظه في الفريرز لحين الاستخدام.

 

الطريقة الثانية 2️⃣

 

المقادير:

-2 معلقة كبيرة زيت زيتون

-2 كوب عصير طماطم

-معلقة صغيرة زعتر مجفف

-معلقة صغيرة ثوم مفروم

-نصف معلقة صغيرة بصل بودر

-رشة كمون ناعم

-ملح وفلفل اسود حسب الذوق

 

طريقة التحضير:

فى حلة على النار نضيف الزيت وننزل بعصير الطماطم والثوم والزعتر ونتبل بالملح والفلفل الأسود ونقلب الخليط ونسيبه على نار  هادية لحد ما يغلى ويتسبك.

 

(أفضل طريقتين لعمل صوص الشوكولاتة) 

 

الطريقة الأولى 1️⃣

 

المكونات:

-كوب حليب

-3 معلقة كبيرة سكر

-معلقة كبيرة نشا

-معلقة كبيرة كاكاو خام

-ربع معلقة صغيرة نسكافية (قهوة سريعة الذوبان)

-60 جرام قطع شوكولاتة أو شوكليت شيبس

 

طريقة التحضير:

 

- اخلطي كل المكونات في كاسرولة أو حلة على البارد لحد ما المكونات تمتزج مع بعضها كويس.

- حطي الكاسرولة أو الحلة على نار متوسطة وقلبي كويس بمضرب سلك يدوي وأول ما الصوص يبدأ يتقل ضيفي قطع الشوكلاتة  أو الشوكليت شيبس مع التقليب المستمر لحد ماتحصلي على القوام المطلوب وبعدين ارفعيه عن النار وضيفي الزبدة أو الزيت وقلبي كويس وسيبيه يبرد،

 وبعدين حطيه في برطمان محكم الغلق ودخليه الثلاجة لحين الاستخدام.

- *ملحوظة *

بلاش تسيبي الصوص فترة طويلة على النار عشان ميبقاش تقيل، ولو حسيتي إنه تقيل هتزودي شوية حليب، كل ما كان الحليب أكتر كل ما كان الصوص أخف.

- يستخدم الصوص في تزيين الكيك والحلويات بأنواعها.

 

الطريقة الثانية 2️⃣

 

المكونات:

-كوب حليب

-كوب سكر بودرة

-كوب زيت

-نصف كوب كاكاو خام

 

طريقة التحضير:

- نحط الحليب والسكر في الخلاط الكهربائي ونضربهم كويس لحد ما يمتزجوا كويس والسكر يدوب.

- نضيف الكاكاو ونضرب كويس لحد ما الكاكاو يدوب.

- نبدأ بإضافة الزيت للخليط خيط رفيع بالتدريج مع الإستمرار في الضرب لحد ما يتكون معانا صوص الشوكولاتة اللذيذ، ولوحابة الصوص يبقى تقيل أكتر زودي كمية الزيت.

- استخدمي الصوص في تزيين الكيك والحلويات والآيس كريم وممكن تحفظيه في برطمان زجاجي وتدخليه الثلاجة لحين الاستخدام .

 

(حليب مكثف محلى) 

 

المكونات :

- كوب حليب بودرة

- كوب سكر بودرة

- معلقة كبيرة زبدة مذابة

- ربع كوب ماء ساخن

- رشة ملح

 

طريقة التحضير :

- في الخلاط أو الكبة ضيفي الحليب البودرة مع السكر البودرة والزبدة والماء الساخن ورشة الملح واضربيهم كويس لحد ماتحصلي على القوام المطلوب ولو حسيتي إن القوام تقيل أوي زودي شوية ماء.

- صبي الحليب المكثف في برطمان محكم الغلق واحفظيه في الثلاجة لمدة تصل إلى 3 شهور.

 

(صوص الكراميل) 

 

المكونات:

-كوب سكر (200 جرام)

-معلقة كبيرة ونصف زبدة

-كوب حليب (200 مل)

-معلقة كبيرة نشا مذابة مع ملعقتين كبار حليب

-رشة ملح

 

طريقة التحضير:

- نحط حلة كبيرة على نار متوسطة ونسيبها تسخن وبعدين نضيف السكر فقط بدون ماء ونسيبه وأول ما يبدأ يتكرمل منتحت وياخد لون من الأطراف نقلبه بالمضرب السلك كويس وأول ما ياخد لون ذهبي متوسط نهدي النار خالص أهم حاجة نقلب كويس عشان مايعملش كتل.

- بعد السكر يدوب نضيف الزبدة ونقلب كويس لحد ما الزبدة تسيح.

نضيف الحليب الساخن على الخليط ونقلب كويس لحد ما المكونات تمتزج مع بعضها وبعدين نضيف خليط الحليب والنشا ونقلب لحد ما نحصل على القوام المطلوب وبعدين نضيف رشة الملح ونقلبها كويس ولو حسيتي إن فيه تكتلات ممكن تضربيه بالهاند بلندر أو لو في الخلاط.

- نصب الكراميل في برطمان محكم الغلق ونحط كيس نايلون على وش الكراميل ونغطية بغطاء البرطمان ونسيبه يبرد.

- ممكن نحفظ صوص الكراميل في الثلاجة أو الفريزر لمدة 3 اسابيع.

- يستخدم صوص الكراميل عادة في أنواع مختلفة من الحلويات ويدخل في تحضير بعض أنواع الفطائر، بيدي مذاق مميز جدًا ، 

ويمكن أن يستخدم في الزينة بحيث يتحط فوق العديد من أنواع التورتة والجاتو والمثلجات، وممكن نستخدمه في العصير  المثلج أو المشروبات الباردة المختلفة.

 

(الباستري كريم) 

 

المكونات :

- 4 صفار بيض

- نصف كوب سكر

- ثلث كوب نشا

- 2 كوب حليب ساخن

- معلقة كبيرة زبدة

- معلقة كبيرة ڤانيليا

 

طريقة التحضير :

- اول حاجة هنسخن الحليب كويس في حلة على النار.

- بإستخدام المضرب اليدوي أو الكهربائي نخفق الصفار مع السكر والڤانيليا لحد ما اللون يبقى فاتح شوية وبعدين نضيف النشا ونقلب كويس 

-وبعدين نصب الحليب الساخن بالراحة وبالتدريج على خليط الصفار مع التقليب المستمر عشان ميعملش أي تكتلات معانا.

- نصب الخليط في حلة ونسخنه على نار ونقلب باستمرار لحد ما نحصل قوام تقيل وبعدين نضيف عليه الزبدة ونقلب كويس وممكن  نضيف ڤانيليا زيادة أو نصف معلقة عصير ليمون أو بشر ليمون حسب الرغبة.

- نصب الخليط في بولة ونغطيها بكيس بلاستيك لمنع تكوين طبقة ونسيبه لحد ما يبرد.

- يستخدم الباستري كريم لحشو الاكلير و البروفيترول والتارت الحلو.

 

 

(صوص التوفي) 

 

المكونات:

-كوب سكر

-كوب حليب سائل

-كوب الا ربع حليب بودرة

-رشة ملح

 

طريقة التحضير:

- في حلة على نار متوسطة ندوب السكر على النار يبقى طبقة واحدة ونسيبه بدون تقليب هنحرك الحلة بس من وقت للتاني عشان نوزع السكر وأول ما يبدأ يتكرمل نقلبه بالمضرب السلك ونضيف الزبدة ونقلب كويس لحد ما الزبدة تسيح.

 

- نضيف الحليب الساخن بالتدريج مع التقليب المستمر لحد ما المكونات تتجانس وبعدين نضيف الحليب البودرة ونقلب كويس جدًا وبعدين نرفعه عن النار.

- يستخدم لتزيين الكيك والكاب كيك والبان كيك والوافلز والأيس كريم.

 

*ملحوظة مهمة * 

 

لصوص توفي قوامه تقيل:

هنزود ربع كوب حليب بودرة يعني كوب كامل بدل كوب الا ربع ونسيبه على النار لحد ما نحصل على قوام تقيل والتوفي التقيل نقدر نستخدمه في الحشوات المختلفة .

(كريمة الزبدة) 

 

المقادير :

 

- نصف كوب زبدة نباتي شورتينج

- نصف كوب زبدة حيوانى لورباك

- نصف كيلو سكر بودرة ناعم

- معلقتين حليب ومعلقتين ڤانيليا حسب الرغبة وممكن نضيف بشر قشر الليمون

 

طريقة التحضير:

- نخفق نوعين الزبدة مع بعض في الميكسر لمدة دقيقة

وبعدين ننزل بالسكر ونخفق ونضيف باقي المكونات ونخلطهم كويس جداً لحد ما تتكون كريمة بيضاء غنية زي القشطة وبعدين نزين بيها الكب كيك أو نحشي بيها التورتة.

 

*وبالهنا علي قلبكم*