طريقه عمل الكيكه العاديه الهشه فالبيت زي بتاعت المحلات

مقادير الكيكه العاديه الهاشه

مقادير الكيكة العادية الهشة

لو نفسك تعملي كيكة هشة وطرية زي بتاعة المحلات وريحتها تقلب البيت كله، الوصفة دي ليكي وهتطلع مظبوطة من اول مرة. المقادير كلها موجودة في كل بيت ومش هتكلفك حاجة. هتحتاجي ثلاث بيضات كبار ولازم يكونو بحرارة الغرفة مش من التلاجة، كوب ونصف سكر ابيض ناعم، كوب الا ربع زيت ذرة، كوب لبن حليب كامل الدسم، اثنين كوب ونصف دقيق ابيض فاخر منخول مرتين، كيس بيكنج بودر ستة عشر جرام، كيسين فانيليا، رشة ملح صغيرة جدا، معلقة صغيرة خل ابيض وده هو السر اللي بيخلي الكيكة هشة زي الاسفنجة، ومعلقة صغيرة بشر برتقال لو حابة ريحة حلوة.

طريقة تحضير الكيكة خطوة بخطوة

اول حاجة مهمة جدا شغلي الفرن على درجة حرارة مية وتمانين قبل ما تبدأي بربع ساعة على الاقل ولازم الفرن يكون سخن كويس. تاني حاجة في الخلاط الكهربائي حطي البيض والسكر والفانيليا والخل واضربيهم لمدة اربع دقايق لحد ما الخليط يبقى لونه فاتح وكريمي وحجمه يتضاعف. بعد كده انزلي بالزيت على شكل خيط رفيع وانتي بتضربي وبعدين انزلي باللبن واضربي دقيقة واحدة فقط. في بولة كبيرة انخلي الدقيق مع البيكنج بودر ورشة الملح مرتين عشان تدخلي الهوا للدقيق. انزلي بالخليط السائل على الدقيق وقلبي براحة جدا من تحت لفوق في اتجاه واحد باستخدام معلقة خشب او مضرب يدوي. اوعي تقلبي بسرعة او تستخدمي الخلاط في المرحلة دي عشان الكيكة متطلعش مكتومة. ادهني صينية مقاس اربعة وعشرين زيت ورشة دقيق وصبي الخليط لحد نصف الصينية فقط واخبطي الصينية خبطتين على الرخامة.

تسوية الكيكة وسر نجاحها

دخلي الصينية الفرن على الرف اللي في النص على درجة حرارة مية وتمانين لمدة خمسة وثلاثين دقيقة الى خمسة واربعين دقيقة حسب قوة الفرن عندك. اهم قاعدة في الكيكة اوعي تفتحي الفرن عليها اول تلاتين دقيقة نهائيا حتى لو شمتي ريحتها. لو فتحتي عليها بدري هتهبط منك وتبوظ. بعد خمسة وثلاثين دقيقة افتحي براحة واختبريها بخلة اسنان خشب في منتصف الكيكة لو طلعت نظيفة يبقى استوت لو لسه فيها عجين سيبيها خمس دقايق كمان. لما تستوي اطفي الفرن وسيبيها جوه خمس دقايق والباب موارب وبعدين طلعيها تبرد عشر دقايق.

افكار للتزيين والتقديم

ممكن تقدميها سادة مع كوباية شاي بلبن الصبح بتبقى تحفة. وممكن تزينيها بصوص شوكولاتة اقتصادي زي اللي في الصورة. سيحي مية جرام شوكولاتة مطبخ على حمام ماء ساخن مع معلقة كبيرة زيت ومعلقتين لبن وقلبي لحد ما تسيح تماما وصبيها وهي سخنة على وش الكيكة ورشي عليها فستق مجروش او جوز هند مبشور او شوكولاتة فارماسيل ملونة للاطفال. لو عايزاها بالشوكولاتة شيلي ثلاث معالق كبيرة دقيق وحطي مكانهم كاكاو خام غامق. لو عايزاها رخامية اقسمي الخليط نصفين نصف ابيض ونصف بالكاكاو وصبيهم بالتبادل. عشان تفضل طرية لتاني يوم غطيها بكيس او علبة محكمة بعد ما تبرد تماما واوعي تحطيها في التلاجة وهي سخنة عشان متنشفش. جربيها النهاردة بنفس الخطوات وهتدعيلي.

---