كيكة الرواني أو كيكة البسبوسة

كيكة الرواني:

وتسمي بكيكة الرواني أو كيكة البسبوسة وده لأن قوامها  بيجمع بين الكيك والبسبوسة في وصفة واحدة، يعني بنحط فيها دقيق وسميد مع بعض.

الرواني من أطعم وأخف الكيكات اللي ممكن تجربوها، قوامها اسفنجي جداً، مش مسكرة زيادة عن اللزوم وكمان بتكون دايبة.

ودي اظبط مقادير هتعملوا بيها الرواني في البيت.

الوصفة دي مش معقدة خالص يا جماعة ممكن نستخدم خلاط أو ممكن نستخدم عجان، مكونات الوصفة سهلة جداً ومتوفرة في كل بيت ممكن تعتبروها من الكيكات اليومية اللي ممكن تحضروها في البيت.

المكونات:
- 4 بيضات بحرارة الغرفة 
- كوب زبادي ( 220 مللي )
- كوب سميد ( 170 جرام )
- كوب زيت ( 200 جرام )
- كوب سكر ( 200 جرام )
- كوب دقيق ( 130 جرام )
- ملعقة صغيرة فانيليا سكر بودرة ( 5 جرام )
- ملعقة كبيرة بيكنج بودر ( 10 جرام )
- عصير ليمونة صغيرة
الشربات: 
2 كوب سكر ( 400 جرام )
2 كوب ماء ( 500 مللي )
شريحة ليمون.

 

أول خطوة في تحضير الرواني بنبدأ بتحضير الشربات علشان لازم يكون دافي لما نضيفه عليها.

نضع السكر في إناء ونضيف عليهم الماء وعليهم شريحة الليمون وبعدين نقلبهم مع بعض، أول ما السكر يدوب نوقف تقليب.

نضع الخليط علي نار عالية لحد ما يبدأ يغلي، مجرد ما يبدأ الغليان نهدي النار ونسيبه لمدة 7 دقايق.
الطريقة:
نضيف البيض وعليهم السكر والفانيليا نخفقهم خمس دقايق علي أعلي سرعة لحد ما القوام يبقي كريمي لونه فاتح وحجمه يتضاعف.
في الخطوة دي نوقف خفق ونزود كوب من الزبادي، وبعدين نبدأ بالخفق مرة كمان وننزل عليهم بالزيت تدريجياً ونزود عليهم عصير ليمونة صغيرة، ونبدأ نضيف المواد الجافة:
كوب دقيق وعليهم كوب من السميد والبيكينج بودر، ثم نخلط لآخر مرة علي سرعة هادية لحد ما نتأكد إن المكونات كلها اندمجت مع بعض، الخليط بقي كريمي ومفيش فيه أي كتل تماماً.

نوقف خلط ونقلب من تحت لفوق لحد ما نتأكد إن كل القوام بقي واحد.

نصب الخليط في صينية مقاس 30 * 30 واخدة مسحة سمن بسيطة من تحت.

نضع الصينية في فرن ساخن مسبقاً علي درجة حرارة 175 الرف اللي في النص من مدة تتراوح مابين 35 إلي 45 دقيقة.

وأهم حاجة في تسوية الرواني إن هي تخرج بلون ذهبي غامق.

أول ما تخرج من الفرن نتركها ترتاح لمدة 3 دقايق وبعدين نسقيها بالشربات الدافي.

نتركها ترتاح لمدة مش أقل من ساعتين علشان تتشرب أكتر وطعمها يبقي أحلي.

ممكن نقدمها سادة أو نزينها بحاجة بسيطة من جوز الهند، نزود شوية علي كل واحدة فيهم مش أكتر من كده.

كل ما نسيب الرواني ترتاح أكتر كل ما طعمها يبقي أحلي.
طريقة تانية للتزيين:
نضع مربي مشمش ناخد منها تقريباً ملعقة كبيرة علي الصينية كلها، بعدين نضع عليهم شوية من جوز الهند ونوزعهم علي الصينية وبعدين نقطع الصينية مكعبات صغيرة علشان تعمل معانا كمية كبيرة ونضيف لكل واحدة فيهم حبة رفايللو.