حلويات من دمياط اللينزا - العزيزية
حلويات من دمياط
اللينزا – العزيزية
أكيد كلنا عارفين إن دمياط هي أكثر المحافظات المصرية شهرة في مجال صناعة الحلويات الشرقية ومعروفة بإن اللي بيدوق أي صنف حلويات فيها صعب جدا إنه يلاقي زيه في أي مكان تاني. ده طبعا غير حتمية وجودها في جميع المناسبات والاحتفالات المختلفة في كل مكان في مصر وحاليا كمان بقا خرج مصر. وطبعا كلنا عارفين سفرة رمضان اللي لا تخلو من وصفات حلويات دمياط المختلفة والمتنوعة واللي لا يختلف على حبها اتنين.
وهنا هنتعرف مع بعض على نوعين من الحلويات الدمياطي واللي دمياط مشهورة بيهم جدا في كل مكان في مصر. وهما اللينزا، والعزيزية ويللا بينا مع بعض نتعلم طريقة عملهم في البيت وبكل سهولة وبمكونات موجودة في كل بيوتنا بفضل الله.
- طريقة عمل اللينزا الدمياطي:-
المكونات:-
1 كوب زبدة أو ممكن سمن.
1 كوب سكر بودرة.
1 بيضة + فانيليا.
رشة ملح.
1 كوب جوز هند ناعم.
2 كوب دقيق.
2.5 كوب لبن (حليب)
2 ملعقة نشا كبيرة
الخطوات:-
- نخلط الزبدة أو السمن كويس جدا مع السكر البودرة للوصول لقوام كريمي ويفضل استخدام مضرب كهربائي للوصول للقوام المطلوب.
- نضيف البيضة ومعاها الفانيليا مع الخلط الجيد.
- في صينية مقاس 30 أو 32 مدهونة كويس بالسمن نفرد نص مقدار العجين وندخله الفرن على درجة 180 فقط لتتماسك وليس للتسوية.
- في المرحلة دي بنعمل القشطة (الكريمة) اللي هي الحشو وفيها بنضيف مقدار النشا لمقدار اللبن (الحليب) ع البارد ونقلبهم كويس جدا وبعدين نرفعهم على النار إلى أن يتقل القوام.
- بنخرج الصينية من الفرن ونتركها تبرد ونفرد الكريمة عليها.
- الجزء المتبقي من العجين لو نشف شوية بنضيف ليه 2 ملعقة لبن (حليب) ونخلطهم كويس مع بعض ونضعها في كيس حلواني أو (كيس كريمة) ونقسم العجين على وجه الكريمة (الحشوة) على شكل خطوط متداخلة وندخلها الفرن على درجة حرارة 180 إلى أن يصل لون وجه الصينية للإحمرار.
- نخرج الصينية من الفرن وندهن الوجه بكمية من الشربات (القطر) أو العسل الأبيض للحصول على وجه لامع وشهي ويمكن التزيين بأي شيء متاح لكم.
وبالهنا والشفا
- طريقة عمل العزيزية الدمياطي:-
المكونات:-
100 جرام مكرونة اسباجيتي أو شعيرية.
رشة ملح + ملعقة زيت كبيرة.
2 لتر لبن (حليب).
½ كوب جوز هند ناعم.
فانيليا.
1 كوب سكر.
125 جرام نشا + 1 كوب ماء.
الخطوات:-
- توضع حلة على النار وفيها مقدار كافي من الماء لسلق المكرونة مضاف ليها رشة ملح مع مقدار الزيت للوصول لدرجة الغليان ونضيف ليها المكرونة إلى أن تستوي.
- بعد الاستواء نصفي المكرونة كويس وتتغسل بماء بارد لإيقاف عملية التسوية.
- يوضع اللبن (الحليب) على النار للتسخين وبعدها نضيف عليه المكرونة مع التقليب المستمر على نار هادية.
- نضيف ليهم مقدار جوز الهند مع الفانيليا مع الاستمرار في التقليب على نار هادية.
- باستخدام الهاند بليندر أو الخلاط الكهربائي العادي نضرب الخليط جيدا للوصول لأقصى لدرجة نعومة.
- وهنا نعيد الخليط للحلة مرة تانية ونخلط مقدار النشا مع كوب الماء البارد كويس جدا وبعدين نضيفهم على خليط اللبن(الحليب) والمكرونة.
- الاستمرار في التقليب إلى أن يتماسك القوام بعض الشيء.
- في صينية مقاس 32 أو 34 مدهونة كويس بالسمن نضع الخليط كاملا مع دهن الوجه كويس بالسمن قبل دخول الصينية للفرن للحصول على لون أحمر شهي.
- ندخل الصينية للفرن على درجة حرارة 180 ليصل وجه الصينية للون المناسب.
وبالهنا والشفا
وفي النهاية أتمنى تجربو الوصفات الدمياطية الأصيلة وأتمنى إنها تنول إعجابكو.
