طريقه عمل كباب الحله في صوص البصل البني
طريقه عمل كباب الحله في صوص البصل البني :
المكونات :
- نص كيلو لحمه متقطعه مكعبات صغيره
- بصل “حسب ما تحبوا طعمه ف الاكل قد اي ”
- ملعقتين كبار سمنه وممكن نستخدم زيت
- ثوم مبشور او مهروس
- التوابل:
- معلقه ونص ملح او حسب الرغبه
- معلقه صغيره فلفل اسود
- بهارات لحمه وياريت لو قويه
- ورق لورا
الطريقه :
هنقطع اللحمه مكعبات صغيره ونقوم بتنشيفها جيدا من اي ماء فيها عشان تتحمر
وهنقطع البصل علي حسب نسبه قد اي بتحبوه في الاكل بس تقريبا هيبقا قد مقدار اللحمه يعني كميه البصل قد كميه اللحمه يعني هنقع نص ك بصل شرايح كدا البصل هيكون باين شويه في الصوص بس مهري جدا
لو عايزينه مش باين في الصوص ودايب ابشروه في الكبه
وبعد كدا نحط حله علي النار بين متوسطه والعاليه ونسيح فيها معلقه سمنه كبيره اول لما تسخن
نحط اللحمه من غير مانزحم الحله عشان تتحمر كويس ونسبها علي اول وش من دقيقه لدقيقتينوبعدين نقلبها علي الوش التاني
احنا هنا مش بنسوي اللحمه بالكامل احنا عايزينها تتحمر اوتتشوح
لما تتحمر من كل الاتجاهات نشلها ونحط باقي الكميه لحد ما نخلص الكميه كلها
وبعد ما نخلص تحمير اللحمه نشيلها ونحط في نفس الحله معلقه سمنه كبيره
ونحط 3 فصوص ثوم كبار مهروسين ونحط عليهم البصل ونقلبهم كويس لحد ما البصل يدبل ولونه يغمق
هنا نضيف اللحمه
بعد كدا نحط التوابل بتاعنا ما عدا ورق اللورا ده هنستخدمه في الاخر ونقلب كويس لمده دقيقتين عشان ياخدوا من طعم بعض
بعد كدا نحط كميه من المياه السخنه تكفي نغطي بيها اللحمه بالظبط وهنا نحط ورق اللورا ولما نتأكد ان المايه بتغلي غليان خفيف نهدي النار وتغطي الحله ونسيب اللحمه تستوي علي نار هاديه
كل من تلت لنص ساعه نبص علي اللحمه ونقلبهاولو لقيناها محتاجه مايه نزود مايه تغطي اللحمه وبعد كدا نغطي الحله ونسيبها تكمل سوا
كل قطعيه من اللحمه بتاخد مده معينه من السوا لحد ما تبقى اللحمه مهريه والشوكه تدخل فيها بسهوله
نيجي بقا للصوص الي في اللحمه لو عايزينه خفيف يبقا تطفوا علي الحله بعدما اللحمه تستوي
لو عايزينه تقيل زودي مايه وسيبه يغلي شويه ع النار من غير ماتغطي الحله لحد ما يوصل للقوام الي عايزاه
الخاتمه :
وبكده نكون خلصنا كباب الحله بصوص البصل البني ومن افضل الاصناف الي تتقدم معاه هو الرز المعمر هتبقي رهيبه
بتمنلكوا سفره هنيا
