كيفية عمل مكرونة بالصوص الوردي أو صوص الروزيه الايطالي والطعم خطير يستحق التجربة

نبدا كده وبسم الله اول حاجه المقادير البسيطه والسهله بتاعتها وهي:

المقادير

مكرونه  (الكميه حسب الرغبه)

صوص الطماطم: 

ملعقة كبيرة زيت زيتون أو زبدة 

بصلة 

3 فصوص ثوم 

رشة فلفل حار (حسب الرغبه)

ملعقة من معجون الطماطم 

عصير طماطم طازة :

3 حبات طماطم

 ملح وفلفل أسود 

وريحان وزعتر (اختياري)

 ورشة سكر 

الطريقة الأولى: نضيف كريمة الطبخ حتى نصل إلى اللون الوردي 

الطريقة الثانية: بديل كريمة الطبخ 

2 ملعقة كبيرة زبدة 

2 ملعقة كبيرة دقيق 

كوب ونصف حليب 

ملح 

فلفل أسود

رشة جبنه موزريلا او برمجان (حسب الرغبه)

وبعد كده بقي نتوكل على الله ونبدأ طريقه التحضير وهي كالاتي:

طريقة التحضير

اول خطوة هي مرحلة سلق المكرونه 

قبل كل شئ  لازم نسخن ميه على النار وتكون بتغلى ونحط فيها معلقة ملح كبيره ونحط فيها المكرونه لحد اما تتسلق وتكون بالتسويه اللي احنا بنحبها سواء طريه او نص سوى حسب الرغبة وعقبال متتسلق هنجهز الصوص الوردي

ونبدأ نعمل في صلصة الطماطم 

اول حاجه هنحط شوية زيت زيتون صغيرين عشان نحمر فيهم البصله وتكون مفرومه ناعم وهنقلبها لحد اما تدبل شويه وبعد كده نضيف عليها الثوم المفروم عشان يتحمر هو كمان بس من غير ميتحرق يدوب يتغير لونه شويه ونحط شوية شطه حمره حسب الرغبه عشان تدي نكهه جميله ونزود معلقة صغيره من معجون الطماطم المركز عشان يزود نكهة الطماطم وبعد كده هنزود الطماطم الطازه بعد منضربها ف الخلاط ونقلب ونسيبها تستوي وتتركز مع الخليط وقوامها يتقل وهنبدأ نحط التوابل عشان يدي الصوص طعمه الحلو ونضيف ملح وفلفل اسود و ريحان وزعتر ونقلبهم مع بعض ونسيب الصوص يتقل شويه واول ما نحس ان القوام بقى مظبوط واتبخر منه ميه كتير وبقى تقيل ونكهة التوابل ظهرت فيه نشوف لو محتاج ملح ولا كده تمام  

بعد كده هنبدا نضيف الصوص الابيض وهنا فيه طريقتين:

الطريقة الاولى وهي الطريقة الاسهل والاصليه اللي هي بإضافة شويه من كريمة الطبخ ونخلطها علطول مع صلصة الطماطم  لحد اما نوصل للون الوردي الجميل وبعد كده نضيف عليهم المكرونه اللي اتسلقت ولو الصوص كان تقيل ممكن نضيف شوية من ميه سلق المكرونه عشان نخففه شوية وميكنش متماسك مع المكرونه ويعجن منك خصوصا انها لما بتبرد الصوص بيتقل شويه وطبعا ممكن نضيف جبنه موزريلا او برمجان حسب الرغبه ودي كده الطريقة الاولى وبيكون طعمها روعه ولذيذ جدا وبتجمع بين حلاوة صلصة الطماطم و الكريمه

وبالنسبه للطريقة التانيه لو مفيش عندك كريمة طبخ وعايز تعمل الصوص الوردي هنعمل صوص ابيض سريع بديل للكريمه ونخلطه مع صلصة الطماطم اللي عملناها 

اول حاجه هنحط ذبده ودقيق بكميات متساويه على النار  ونقلب لحد اما الدقيق يكون استوى وتبقى عجينه خفيفه بعد كده هنزود الحليب بالتدريج ونقلب كويس عشان ميكنش فيه تكتلات ويطلع الصوص معانا ناعم واول ما يوصل للقوام المرغوب فيه نحط رشه من الفلفل الاسود والملح ويكون كده جاهز لاستخدامه بدل كريمه الطبخ ونضيفه على صلصة الطماطم اللي عملناها في الاول ونزود منها لحد اما نوصل للون الوردي  والقوام المرغوبين وبعد كده نضيف المكرونه ونقلب كله مع بعضه وكده يكون جاهز ويتم التقديم زي مهو او نضيف جبنه على الوش حسب الرغبه 

(وبالهناء والشفاء مقدما ).

 قد يهمك ايضا: اسهل طريقة لعمل شوربة المشروم كريمي ولذيذه وعلى طريقه أشهر المطاعم

قد يهمك ايضا: اسهل طريقة لعمل فاهيتا المشروم والخضراوات للدايت

    قد يهمك ايضا: طريقة تحضير السلطه الوردية الصحية للدايت

ومتنسوش تقولوا لصحابكم  واحبابك علي مكرونة الصوص الوردي وطعمها الخطير عشان يعملوها ويستمتعوا بيها 

ولو عجبكم المقال متنسوش تتابعوني وتكتبولي كومنت حلو زيكم، وتشوفوا باقي الوصفات

(والسلام خير ختام)