طريقه عمل المحشي
تعالي اقولك ازاي تعملي احلي طشة محشي هيطلع معاكي مزبد وبيلمع وزى العسل وتركات في خلطة المحشي لو عملتيها هطلعي احلي محشي من تحت ايديكي زى محشي اهالينا زمان طعم وريحة 👌
هقولك كمان ازاي تسوية صح وميكونش معجن معاكي وصوابع المحشي تكون معاكي زى صوابع الدهب 🥰👌
نقول يابركة بسم الله 🤲👇👇
افرمي بصل علي قد كمية المحشي وافرمي مع البصل قرنين فلفل حامي أو بارد حسب الرغبه بس متفرميش البصل اوي عشان مينزلش ميه خليه خشن شويه
في حلة عالنااااار فيها حتة سمنة وشوية زيت وحطي البصل فيهم يتشوح ويصفر وحطي معلقة ثوم مفروم ورشة من الكمون والكسبرة الناشفة والفلفل الاسود والببريكا يتحمصوا شويه مع البصل تحميص التوابل مع البصل
بيفرق جدا في طعم المحشي بعد كدا حطي الطماطم وشويه ملح وسيبها تتسبك وفي الاخر حطي شويه خضرة محشي كسبرة خضرا وشبت سيبي الصلصة تبرد وحطي فيه الارز المغسول ومتصفي من المية كويس جدا وحطي رشة ملح وفلفل اسود وكسبرة ناشفة وكمون ورشة بسيطة من القرفة
ولو في نعناع ناشف حطي رشة منه بيخلي المحشي في حتة تانية خالص 👌 وحطي بقيت خضرة محشي حوالي حزمتين متقطعين وقلبي الارز مع الصلصة كويس
االحلة اللي سبكتي فيها الصلصة افرشيها ورق اخضر من ورق الكرنب المسلوق واحشي ورقة الكرنب وحطي الارز في نص الورقة والأرز ميكونش كتير عشان بيزيد في السوا ولفي الورقة براحة وجمدى عليها متحطيش الارز عالحروف في الورقة عشان مع السوا الارز بيخرج برة في الحلة
اسقي المحشي بالشوربه وهزى الحلة كويس جدا عشان الشورية تنزل جوة المحشي ولو حاسة أن الحلة مكبوسة ومليانه حطي كمان شويه شوربه زيادة عشان المحشي يستوي كويس حطي معلقة في نص المحشي للآخر عشان توسعي أن الشوربة تنزل في قلب المحشي من جوة وارفعي
جوانب المحشي بالمعلقة عشان الشوربه تنزل تحت المحشي وتضمني أن المحشي يستوي كويس بعد كدا المحشي يغلي غلوتين اتنين بس بالعدد علي نااااااار عالية وبعد كدا هدي الناااار عشان المحشي يستوي براحتة وغطيه كويس عشان البخار يسويه وحطي علي وشة ورقتين كرنب او طبق عشان تضمني ان البخار يسويه كويس وميفكش منك
هتاكلي احلي محشي زى اللوز 🥰❤️
ملحوظة / وانتي بتحشي المحشي متزنقيش صوابع المحشي اوي جنب بعضها سيبي فواصل بسيطة عشان لما تسقية شوربة الشوربه تنزل بين صوابع المحشي ويستوي معاكي
متمليش حلة المحشي للآخر عشان المحشي بيزيد في السوا
حطي معلقتين صلصة من خلطة المحشي في الشوربة اللي هتسقية بيه عشان بيخلي لون المحشي احمر وجميل
لما بتخدمي المحشي في الصلصة والخضرة والبصل بيطلع معاكي احلي محشي هتاكليه 👌
طماطم المحشي مبتصفااااش بتتحط زى ما هيا
لو مش عايزة تحطي ثوم في المحشي براحتك بس صدقيني بيفرق جدا في طعم المحشي 👌
مقدار شوربة المحشي بتبقي تحت اخر سطر من فوق ولكن زى ما قولتلك لو الحلة مليانه ومكبوسة زودي كمان شوية شوربة صغيرين وهزي الحلة كويس جدا عشان المحشي يستوي كويس معاكي 👌
قبل ما تطفي عالمحشي اقدحي معلقة سمنة بلدي مع معلقتين زيت وحطيهم عالمحشي من فوق بيخلي طعمة جميل وبيلمع ومزبد وزى العسل 👌
الف هنا ليكم ياحلوين
