مقلوبة الدجاج خطوة بخطوة.. وصفة ناجحة من أول مرة
طريقة عمل مقلوبة الدجاج.. وصفة سهلة بطعم يجنن:
في أكلات أول ما تتحط على السفرة الكل يستنى ياكل منها، ومقلوبة الدجاج واحدة من الأكلات دي. شكلها شيك، وطعمها حكاية، ومش صعبة زي ما ناس كتير فاكرة. لو أول مرة تعمليها متقلقيش، مع الخطوات دي هتطلع معاكي مظبوطة من أول مرة.
المكونات :
دجاجة متقطعه زي ما تحبي .
2 كوب أرز بسمتي.
حبة باذنجان.
2 حبة بطاطس.
قرنبيط (اختياري).
بصلة كبيرة.
3 فصوص ثوم.
4 أكواب مرقة دجاج.
ملعقة صغيرة كركم.
ملعقة صغيرة بهارات مشكلة.
رشة قرفة.
ملح وفلفل أسود حسب الرغبة.
زيت للقلي.
طريقة التحضير:
أول حاجة اغسلي الفراخ كويس، وبعدها اسلقيها مع البصلة وشوية حبهان وورق لورا لحد ما يستوي، واحتفظي بالمرقة لأنها هتدي للمقلوبة أحلى طعم.
قطعي الباذنجان والبطاطس شرائح، ولو هتستخدمي القرنبيط قطعيه زهرات صغيرة، وبعد كده اقليهم لحد ما يبقوا لونهم ذهبي.
اغسلي الأرز وانقعيه حوالي 10 دقايق ، وبعدها صفيه.
هاتي حلة مناسبة، ورصي في القاع البطاطس والباذنجان والقرنبيط، وبعدها حطي قطع الدجاج، وفوقهم وزعي الأرز بالتساوي.
اخلطي البهارات مع الملح والفلفل والكركم ورشة القرفة، ورشيها على الأرز، وبعدها اسكبي مرقة الدجاج لحد ما تغطي الأرز بحوالي سنتيمتر.
سيبي الحلة تغلي على نار عالية دقيقتين، وبعدها وطي النار، وغطيها وسيبيها حوالي 35 إلى 40 دقيقة لحد ما الأرز يستوي تمامًا.
بعد ما تستوي، سيبيها ترتاح حوالي 10 دقائق، وبعدها اقلبيها في طبق التقديم بهدوء، وزينيها بالمكسرات المحمصة والبقدونس لو حبيتي.
شوية نصائح هتفرق معاكي:
استخدمي أرز بسمتي عشان يطلع مفلفل.
متكثريش المرقة عشان الأرز ميعجنش.
متستعجليش في قلب المقلوبة، وسيبيها ترتاح شوية.
قدميها مع سلطة زبادي ويلا بينا نعمل احلي سلطه زبادي علشان تبقي الوجبه كامله .
طريقه عمل سلطة الزبادي في البيت
المكونات :
2 علبة زبادي
2 فص ثوم مهروس.
عصير نصف ليمونة.
رشة ملح.
رشة فلفل أسود.
رشة نعناع ناشف أو شوية نعناع أخضر مفروم.
ملعقة صغيرة زيت زيتون (اختياري).
الطريقه :
هاتي طبق وحطي فيه الزبادي، وبعدها ضيفي الثوم المهروس وعصير الليمون والملح والفلفل والنعناع، وقلبيهم كويس لحد ما كل المكونات تمتزج مع بعض.
لو بتحبي طعم زيت الزيتون، ضيفي ملعقة صغيرة في الآخر وقلبي مرة كمان.
حطي السلطة في التلاجة حوالي ربع ساعة قبل التقديم، وقدميها باردة جنب المقلوبة أو أي أكلة بتحبيها.
تقدري تزيني المقلوبة بالمكسرات المحمصة والبقدونس المفروم، وقدميها ساخنة، وهتبهري كل اللي هيقعد على السفرة بطعمها وشكلها.
وفي النهاية، مقلوبة الدجاج من الأكلات اللي مهما اتعملت بتفضل ليها مكانة خاصة على السفرة. جربي الوصفة بالطريقة دي، وقدميها مع سلطة الزبادي أو سلطة خضراء، واستمتعي بوجبة لذيذة هتعجب كل أفراد الأسرة، وماتنسيش تشاركينا رأيك بعد التجربة.
الرجاء تسجيل الدخول لتتمكن من التعليق