سر نجاح الفراخ المشوية الطرية من الداخل والمحمرة من الخارج

طريقة عمل الفراخ المشويه في البيت :

الفراخ المشوية من أكثر الأكلات اللي ناس كتير بتحبها، لأنها طعمها لذيذ وفي نفس الوقت أخف من الفراخ المقلية. كمان تعتبر اختيار مناسب للغداء أو العزومات، لأنها بتتشوى من غير زيت كتير وبتطلع ريحتها وطعمها مميزين جدًا. والأجمل إنك تقدر تعمليها في الفرن أو على الشواية بكل سهولة ومن غير أي خطوات معقدة.

مكونات الفراخ المشويه :

فرخة كاملة متوسطة الحجم.

3 ملاعق كبيرة زيت.

عصير ليمونتين.

5 فصوص ثوم مفروم.

ملعقة كبيرة زبادي.

ملعقة صغيرة بابريكا.

ملعقة صغيرة كمون.

ملعقة صغيرة كزبرة ناشفة.

نصف ملعقة صغيرة فلفل أسود.

ملعقة صغيرة ملح أو حسب الرغبة.

رشة كركم (اختياري).

رشة زعتر أو روزماري لإضافة نكهة مميزة.

طريقة تحضير الفراخ المشويه:

أول خطوة اغسلي الفراخ كويس ونظفيها، وبعد كده جففيها بمناديل المطبخ. اعملي شقوق بسيطة في أماكن الصدر والوراك، لأن الخطوة دي بتساعد التتبيلة تدخل لجوا الفراخ وتخلي الطعم ألذ.

في بولة كبيرة اخلطي الزيت مع عصير الليمون والثوم والزبادي، وبعدها ضيفي كل البهارات وقلبي لحد ما الخليط يبقى متجانس. ادهني الفراخ بالتتبيلة من كل الجوانب، وحاولي تدخلي جزء منها تحت الجلد لو تقدري، لأن ده بيخلي الفراخ تحتفظ بطراوتها وهي بتستوي.

بعد التتبيل غطي الفراخ وسيبيها في التلاجة لمدة لا تقل عن ساعتين، والأفضل تبات ليلة كاملة. كل ما مدة التتبيل زادت، كل ما الطعم بقى أقوي سخني الفرن ، وحطي الفراخ على شبكة أو صينية، مع وضع كمية بسيطة من الماء في قاع الصينية عشان تمنع انها تتحرق و تتسوى اسرع . دخليها الفرن لمدة تتراوح بين ساعة وساعة وربع حسب حجمها، مع تقليبها في منتصف الوقت ودهنها من التتبيلة أو العصارة اللي بتنزل منها.

في آخر عشر دقائق ممكن تشغلي الشواية في الفرن علشان تاخد لون ذهبي جميل وتبقى مقرمشة من بره، 

قدمي الفراخ المشوية وهي سخنة مع الأرز البسمتي صوص الطحينة .

^{طريقة تحضير الأرز البسمتي الأصفر:}

مكونات الأرز البسمتي :

2 كوب أرز بسمتي.

3 أكواب ماء ساخن أو مرقة.

2 ملعقة كبيرة زيت أو سمنة.

بصلة صغيرة مفرومة ناعم.

ملعقة صغيرة كركم.

نصف ملعقة صغيرة كاري.

نصف ملعقة صغيرة كمون.

نصف ملعقة صغيرة فلفل أسود.

ملح حسب الرغبة.

طريقة التحضير

أول حاجة اغسلي الأرز كويس لحد ما الميه تبقى صافية، وبعدها انقعيه حوالي10 دقايق او اقو ماتنقعيهوش كتير عشان ما يتكسرش او يبقي معجن ، وبعد كده صفيه.

حطي الحلة على النار وسخني الزيت أو السمنة، وانزلي بالبصل وقلبيه لحد ما يدبل. بعدها ضيفي الكركم والكاري والكمون والفلفل الأسود وقلبيهم مع بعض ثواني عشان ريحتهم تطلع.

ضيفي الأرز البسمتي وقلبيه بهدوء مع البهارات لمدة دقيقتين، وبعدها نزلي الماء الميه أو المرقة، وحطي الملح حسب رغبتك.

لما الأرز يغلي، وطي النار جدًا وغطي الحلة وسيبيه يستوي من 15 لـ20 دقيقة. بلاش تفتحي الغطا كل شوية علشان الأرز يطلع مفلفل.

بعد ما يستوي، سيبيه يرتاح خمس أو عشر دقايق، وبعدها قلبيه بالشوكة بهدوء.

قدمي الأرز البسمتي الأصفر جنب الفراخ المشوية ، ولو حبيتي ممكن تزينيه بشوية لوز أو زبيب محمص، وهيبقى شكله وطعمه أحلى بكتير.

 

وبالف هنا يااحلى واحده بتعمل فراخ مشويه 😎💌