3 طبخات رئيسية فاخرة هتخلي سفرتك ملوكي - أسرار الشيفات المحترفين

3 طبخات رئيسية فاخرة هتخلي سفرتك ملوكي - أسرار الشيفات المحترفين 2026

الطبخة الرئيسية هي قلب السفرة، هي اللي بتحدد هل العزومة نجحت ولا لا، وكل ست بيت شاطرة بتدور على وصفة تجمع بين الطعم الفاخر والشكل اللي يشرف والوقت السريع، وخصوصا في زمن بقينا كلنا بنجري ومفيش وقت نقف في المطبخ 5 ساعات.

النهاردة جبنالك 3 طبخات رئيسية من مطبخ الشيفات المحترفين، نفس الطعم اللي بتدفعي فيه 500 جنيه في المطعم، هتعمليه في البيت بأقل من نص التكلفة، وبمكونات موجودة في كل تلاجة مصرية.

*أولا: طاجن اللحمة بالخضار في الفرن - ملك العزومات*

ده الطبق اللي أول ما بيتحط على السفرة الكل بيسكت من جمال ريحته، وبيعتبر من أشهر الطبخات الرئيسية في مصر والخليج.

*المكونات:*

كيلو لحمة مكعبات من وش الفخدة، 2 بصل أحمر كبير مقطع جوانح، 3 طماطم، 2 فلفل ألوان، 2 بطاطس، 2 جزر، 4 فصوص توم، معلقة كبيرة صلصة، ملح وفلفل أسود وبهارات لحمة وبابريكا وروزماري، كوباية شوربة أو مية سخنة، معلقتين سمنة بلدي.

*طريقة التحضير السرية:*

أهم سر محدش بيقولهولك، شوحي اللحمة الأول، في حلة سخنة جدا حطي السمنة ونزلي اللحمة تاخد صدمة وتاخد لون بني من كل الجوانب، ده اللي بيحبس العصارة جواها ويخليها طرية، شيلي اللحمة وفي نفس الحلة نزلي البصل والتوم وقلبي لحد ما يدبل، وبعدين انزلي بكل الخضار المتقطع مكعبات كبيرة عشان ميتهريش، قلبي 5 دقايق وبعدين رجعي اللحمة وحطي الصلصة والبهارات والشوربة، قلبي كله وحطيه في طاجن فخار وغطيه بورق فويل ودخليه فرن سخن على 200 لمدة ساعة ونص، آخر 10 دقايق شيلي الفويل عشان الوش يتحمر، هيطلع معاكي بيدوب دوبان.

قدميه مع رز أبيض بالمكسرات زي اللي في الصورة، أو عيش بلدي سخن وسلطة خضرا.

*ثانيا: كفتة الحاتي اللي مبتفكش - سر الفحم*

مشكلة كل الناس الكفتة بتفك منها على السيخ، السر كله في التصفيه.

*المكونات:*

كيلو لحمة مفرومة فيها 20% دهن، بصلتين مبشورين ومتصفيين كويس جدا من المية، حزمة بقدونس، ملح وفلفل وبهارات كفتة ورشة جوزة الطيب.

*الطريقة:*

اعصري البصل وخدي التفل بس، اوعي تحطي مية البصل هتفك الكفتة، اخلطي اللحمة مع تفل البصل والبقدونس المفروم والبهارات واعجنيها 10 دقايق لحد ما تبقى زي العجينة، دخليها التلاجة ساعة ترتاح، ودي خطوة مهمة جدا، بعد كده صبعيها على سيخ أو على معلقة خشب وادهني ايدك بمية البصل اللي صفتيها، ورصيها في صينية مدهونة زيت ودخليها فرن سخن جدا 220 لمدة 20 دقيقة، لو عايزة طعم الفحم ولعي فحمة وحطيها في طبق صغير في نص الصينية ونقطة زيت وغطي بسرعة، هتاخد ريحة الفحم الأصلية.

*ثالثا: دجاج بالزبدة والثوم - وصفة 15 دقيقة*

دي وصفة الطوارئ لما يجيلك ضيوف فجأة وعايزة طبخة رئيسية سريعة وفخمة.

صدور دجاج مقطعة شرايح، زبدة، توم مفروم، كريمة طبخ، ملح وفلفل وزعتر، الطريقة تشوحي الدجاج في الزبدة لحد ما ياخد لون دهبي، شيليه وفي نفس الطاسة حطي التوم والزعتر وبعدين الكريمة ورجعي الدجاج 5 دقايق، قدميه مع رز أبيض أو مكرونة.

*3 أسرار ذهبية من شيفات المطاعم الفاخرة:*

1-  اللحمة لازم تكون بدرجة حرارة الغرفة قبل الطبخ بساعة، متطبخيهاش وهي ساقعة من التلاجة هتشد.

2-  البهارات حمصيها دقيقة على الناشف قبل ما تحطيها، ريحتها هتتضاعف 10 مرات.

3-  الملح حطيه في الآخر خالص للحمة، لو حطتيه في الأول هيخليها تنشف.

الطبخ الرئيسي مش مجرد أكل، ده فن وحب، لما تطبخي بحب الأكل بيطلع طعمه مختلف، جربي واحدة من الوصفات دي النهاردة وصوري سفرتك، هتشوفي كمية الكلام الحلو اللي هتسمعيه