طريقة عمل الكشري المصري الأصلي زي المحلات بالظبط

.الكشري المصري هو أشهر أكلة شعبية في مصر، مفيش حد فينا مبيحبوش، من أيام زمان وهو الأكلة الرسمية للغدا، وسعره رخيص ومكوناته موجودة في كل بيت، وبيشبع جدا وطعمه تحفة.

النهاردة هقولكم على الطريقة الأصلية للكشري

## المكونات

 المصري زي المحلات بالظبط، بس بطريقة سهلة وبسيطة هتخلي أي واحدة تعملها من أول مرة وتنجح معاها.

المكونات اللي هنحتاجها:

كوباية رز مصري مغسول، كوباية عدس بجبة بني مغسول، كوباية مكرونة صغيرة أو مقصوصة، كوباية شعرية، كوباية حمص مسلوق، 4 بصلات كبار متقطعين جوانح رفيعة، 5 معالق كبيرة زيت، ملح، كمون، شطة، فلفل أسود.

مكونات الصلصة:

5 طماطم كبيرة مضروبة في الخلاط، 4 فصوص ثوم مفروم، معلقتين خل، معلقة صلصة طماطم جاهزة، ملح وكمون وشطة وكزبرة ناشفة، نص كوباية ماية.

مكونات الدقة:

4 فصوص ثوم مفروم، ربع كوباية خل، كوباية ماية، معلقة كمون كبيرة، ملح وشطة حسب الرغبة، عصير لمونة.

طريقة تحضير الرز والعدس والشعرية:

أولا نجيب حلة ونحط فيها شوية زيت ونحمر الشعرية لحد ما لونها يبقى دهبي فاتح، بعد كده نضيف الرز المغسول والعدس بجبة ونقلبهم كويس مع الشعرية لمدة دقيقتين، بعد كده نحط ماية سخنة تغطي الرز بعقلة صباع، ونحط ملح وكمون ونسيبهم يغلوا وبعدين نوطي النار خالص ونسيبهم يستووا زي الرز العادي بياخد حوالي 20 دقيقة.

طريقة سلق المكرونة:

في حلة تانية نغلي ماية بملح ونسلق المكرونة 8 دقايق ونصفيها ونحط عليها معلقة زيت ونقلبها عشان متلزقش في بعض.

طريقة عمل البصل المقرمش اللي هو أهم حاجة:

نقطع البصل جوانح رفيعة جدا، نرش عليه معلقة كبيرة دقيق ومعلقة نشا ورشة ملح، ونقلبه كويس، وبعدين نقليه في زيت غزير وسخن جدا، منقلبش كتير في الأول لحد ما يبدأ يمسك نفسه، وبعدين نقلب لحد ما لونه يبقى بني فاتح ومقرمش، نطلعه على مناديل مطبخ.

طريقة الصلصة:

في نفس زيت البصل نحط الثوم المفروم ونقلب لحد ما ريحته تطلع، نحط الخل وبعدين عصير الطماطم والصلصة الجاهزة والماية والتوابل كلها، ونسيبها تتسبك على نار هادية ربع ساعة لحد ما تتقل.

طريقة الدقة:

نخلط الثوم والخل والماية والكمون والملح والشطة واللمون ونقلبهم كويس على البارد، ممكن نغليهم غلوة واحدة لو بتحبيها سخنة.

طريقة التقديم:

في طبق كبير نحط طبقة من خليط الرز والعدس والشعرية، وفوقها طبقة مكرونة، وفوقها الحمص المسلوق، وبعدين نصب الصلصة على الوش ونحط البصل المقرمش كتير، والدقة والشطة في أطباق صغيرة جانبية.

نصايح مهمة جدا لنجاح الكشري: استخدمي زيت قلي البصل في كل حاجة بيدي طعم المحلات الأصلي، العدس متسلقيهوش لوحده كتير عشان ميتهريش، الحمص انقعيه من بالليل واسلقيه الصبح، الكشري بيبقى طعمه أحلى تاني يوم، تقدري تعملي كمية كبيرة وتشيليها في التلاجة.

فوائد الكشري: فيه بروتين نباتي من العدس والحمص، ونشويات من الرز والمكرونة، ومفيد جدا للأطفال والكبار وسعره رخيص.