كيكه الشاى الهشه جدا

اول حاجه حبيباتى   نسخن الفرن ع 180 ولو مفيش تايمر زى حلاتى شغليه وانتى بتحضري للكيكه ي ست الكل 

تانى حاجه ندهن الصينيه كويس اوى يعنى حتى الجوانب ودى اهم حاجه عشان لما الكيكه تيجى ترتفع ف الفرن متلزقش فالصينيه وتهبط وتكون مكتومه لازم جدا ندهن الصينيه كويس بالجوانب 

بعد كده نعفرها كويس بالدقيق ونركز على الجوانب

ثالث حاجه ودى مهمه اوى مقاس الصينيه 

بصى الى انتى عوازه.يعنى ايه هقولك على التريكه 

لو وسط حنستخدم معيار الكبايه المج العاديه دى بتاعت كل المصريين لكن لو مقاس اكبر يعنى اكبر صينيه عندك هتبقا نفس المكوناتبس بمعيار مج اكبر الضخم ده وهنقيس عليه كل مكونات الكيكه يعنى معيار مج واحد هنعير بيه كل المكونات 

المكونات هى /

كوبين ونص دقيق

2معلقه كبيره نشا 

باكو بيكنج بودر

3بيضات

فانيلا العاديه

فانيلا برتقال

كوب و نص سكر ناعم

2معلقه كبيره خل

كوب الا ربع زيت 

كوب لبن مغلى

الطريقه /

اول حاجه هنحط المكونات الجافه  الدقيق وومعلقتين النشا وباكو البيكنج بودر مع بعض ف بوله ما عدا الفانيلا و نقلبهم كويس جدا

بعد كده نجيب الخلاط الشقيان معانا والترتيب الى هقولك عليه مهم جدا 

ف الاول هتسخنى كوب لبن ع الهادى

 و هنحط كوب ونص سكر ناعم عليه 3بيضات +فانيلا برتقال+فانيلا عاديه +معلقتين الخل ونضرب كتييير اوى جدا لحد ما لون الخليط يفتح ودى تركه مهمه هتفرق ف شكل الكيكه 

بعد كده نضيف كوب لا ربع زيت ونضرب تانى كويس

بعد كده هننزل بالخليط ده ع الدقيق وهنقلب براحه من فوق لتحت لحد ما كله يتجانس مع بعضه

بعد كده هنجيب كوبايه اللبن السخنه ونضفها ع الخليط مع التقليب كويس جدا ولكن بحركه بطيئه يعنى براحه 

ومتخافيش من اللبن السخن لا هيسوى البيض ولا اى حاجه  صدقينى دى تركه مهمه اوى اوى

بالنسبه لسمك الخليط بيكون متوسط 

وهنزل الخليط ده ف صنيه الفرن ونساوى الخليط ف الصينيه ونخبطها 5خبطات على الرخامه بحيس تكون من جوه مسامها مقفوله وشكلها حلو وطعمها كمان على فكره

وبعد ما تدخل الصينيه الفرن  تحسبى الساعه كام وبعد 25دقيقه تبصى عليها لو احمرت من الجناب اقفلى الجزء الى تحت وشغلى الشوايه 

وسبيها سبيها  سبيها ف الفرن لحد ما تبرد 

وبس

التركات بقا يا قمرات عشان متنسوش/

1/دهن الصينية  وتعفيرها كويس اوى واهم حاجه الجوانب عشان الكيكة متهبطش

2/ نسخن الفرن .مينفعش الكيكه تخش على فرن بارد خليه يسخن على المستوى الى هتسوي بيه الكيكه

3/فانيلا البرتقال بطرف المعلقه حرفيا+فانيلا العاديه +معلقتين الخل الكبار بتفرق اوى

4/اللبن المغلى الى ف الاخر

5/نسيب الصينيه ف الفرن تبرد

6/اعمليها وأنتي فاضيه يا باليل اوى والبيت كله نايم يا الفجر والبيت كله نايم برضه

انا فرقت معايا الخطوه دى

من كتر ماانا فرحت بنفسي انى نجحت اعمل احلى كيكه حكيت لعيالى حكايتى مع الكيكه ومعاناتى انى انجح ف عملها والتريقه الى اتريقوها عليا و المكونت الى اهدرتها ع هيئه  حدوته قبل النوم عن عدم اليأس