تخليل الزيتون التفاحي بكل سهوله وطعم ولا اروع

تخليل الزيتون التفاحي بكل سهوله وبمقادير بسيطه في البيت

 

المقادير

كيلو من الزيتون التفاحي

2جزره كبار مبشورين 

4حبات فلفل احمر حار أو بارد حسب الرغبه 

كوب ليمون معصور يدويا مش في الخلاط عشان المراره

فنجان زيت زيتون او عادي حسب المتوفر 

4معالق كبيره من الملح 

1معلقه كبيره من السكر 

لتر ماء مغلي مسبقا ونتركه ليبرد 

ربع كيلو ليمون متقطعين

الطريقه

نغسل الزيتون كويس اوي وتتخلص من اي واحده مش سليمه

نعمل شق في الزيتون ونحضر طبق فيه مايه فقط 

بعد شق الزيتون نحطه في المايه علي طول وبنعمل كده عشان نحافظ علي لون الشق ميتغيرش

في برطمان مغسول بماء ساخن وخل أو نعقمه بتقريبه من النار ولازم نتأكد أن البخار وصل للداخل كويس كده يبقي اتعقم ننزل فيه بالزيتون والجزر المبشور وحبات الفلفل والليمون المتقطع ونكبسهم كويس 

نضيف ليهم كبايه عصير الليمون

وبعدين نحط عليهم المايه ونكون مندوبين فيها الملح والسكر والمفروض المايه تكون مغطيه تلتين البرطمان

وعلي الوش نحط كام قشره ليمونه من اللي عصرناهم لمنع تسريب الهوا أو حدوث ريم ابيض ومننساش نشيل منهم البذر

وبعد كده نضيف فنجان الزيت

نغلق البرطمان من فوق بكيس نضيف أو استرتش ونقفل عليه الغطاء كويس اوي

اخر خطوه هنرج البرطمان عشان نضمن امتزاج المكونات(الليمون ومحلول التخليل) 

 

ملحوظات

الزيتون بالطريقه دي بيستوي بعد شهرين وتقدري تحفظيه

 سنه كامله وبيكون زي الفل ولو جايبه كميه كبيره ممكن نقسم المقدار علي اكتر من برطمان ونحط جزء من الزيتون صحيح من غير ما نعمل فيه فتحات وده عشان يقعد اكتر بس ده هيغيب شويه في التخليل عن الزيتون المعمول فيه شق أو فتحات

بنحطه علي رخامه المطبخ عادي جدا وممكن مع الاستخدام نحطه في الثلاجه عشان نحفظه لأطول فتره ممكنه

مننساش معلقه السكر عشان بتخلي الزيتون يكون مقرمش مش طري عند الاكل وكمان بتقلل مراره الزيتون

ممكن نضيف مع المقادير كام واحده من ورق اللوري عشان يحفظ الزيتون ويمنع تكون اي طبقه بيضا علي الوش

ممكن كمان نضيف علي الوش كام حبه ثوم صحيح او مفروم

عند فتح برطمان الزيتون ممنوع تجيبي الزيتون بايدك استخدمي معلقه افضل عشان تحافظي علي الزيتون

نكهه الزيتون بتكون قويه من غير ما نضيف اضافات كتير

تقدري تضاعفي المقادير لو هتعملي كميه اكبر

نقدر نستخدم الزيتون المخلل باكتر من طريقه أهمها الاكل او ممكن نحطه علي كتير من المعجنات والفطائر اللي بتعملها في البيت وممكن كمان نعمل منه اسبريد زيتون

يا ريت الناس اللي عندها املاح كتير أو ضغطها مرتفع متاكلش كميه كبيره من الزيتون في اليوم عشان منتعبش منه وفي العموم الاعتدال في اكل الحوادق مطلوب عشان صحتنا غاليه علينا

وبكده نكون عملنا احلي مخلل زيتون باسهل وارخص طريقه ومن البيت وتبقي حاجه نضيفه

اتمني تكون الطريقه سهله وبسيطه وتكون عجبتكو ويلا الحقو موسم الزيتون وخللو في البيت بكل سهوله

وبالف هنا وشفا