أسرار النفس الحلو في الطبخ: تكات ذهبية تجعل أطباقك حديث الجميع .
(المقدمة)
كل ست بيت أو عروسة تبدأ حياتها بيبقي حلمها إن أكلها يكون لة نفس مميز، والكل يحلف بجمال طعم صوابعها . الحقيقية إن الطبخ مش مجرد مقادير بنحطها علي بعض ، لكنة “فن وتكات"صغيرة بتغير الطعم 180 درجة . في المقال دة ، هشاركم خلاصة تجاربي الشخصية وأسرار الطبخ أللي بتخلي الأكل يطلع أحلي من المطاعم ، وبمكونات بسيطة جدآ موجودة في كل بيت ، عشان تكوني “شيف” محترفة في مطبخك .
أولآ : أسرار اللحوم والشوربة الصافية
أول تكة بتبدأ من غسيل الطيور ، الفراخ والبط لازم يتنقعوا في (مية ، ليمون ، معلقة دقيق ، وشوية جنزبيل بودرة )عشان تضمني نظافة تامة . أما بالنسبة السر اللي بيخلي الشوربة طعمها “خرافية”ولونها صافي ، هو إنك تشوحي اللحمة أو الفراخ الأول مع فص مستكة وحبهان وورق لورا قبل ماتضيفي المية السخنة . التشويح ده بيقفل المسام وبيخلي اللحمة محتفظة بطعمها جوه . وضيفي دايمآ بصلة وجزره وفص ثوم سليم في الشوربة ، وشوفي الفرق في الطعم والريحة اللي هتقلب البيت .
ثانيآ : سر المحشي المصري ، الجبار (زي خلطةزمان)
المحشي هو “الراعي الرسمي" للعزومات ،وعشان يطلع معاكي زي ماإنتي شايفة في صور العزومات الفخمة ، التكة هنا في (الخضرة والصلصة) .لازم تتسبك الصلصة كويس جدآ لغاية ما السمنة تظهر علي الوش ، وبعد ماتطفي النار وتضيفي الرز حطي الخضرة (شبت ، وبقدونس ، وكسبرة ) في الأخر خالص الحركة دي بتخلي ريحة الخضرة تفضل قوية وطعمها طازة . ولو عايزة “تكة” زيادة ،ضيفي معلقة سمنة بلدي صغيرة علي وش الحلة وهي بتستوي ، دي اللي بتدي اللمعة . والطعم الاصيل …
ثالثآ : الرز المفلفل والمكرونة بالبشاميل الكريمي
عشان الرز يطلع معاكي “واحدة بواحدة” وبيلمع ، لازم يتشوح كويس جدآ مع الزيت أو السمنة لغاية ماكل حباية تتغلف بالمادة الدهنية قبل ماتضيفي المية السخنة أما بالنسبة للبشاميل ،فالسر عشان يطلع كريمي مايكلكعش منك هو إنك تضيفي اللبن وهو بارد علي الدقيق المتحمر ،وتقلبي بالمضرب اليدوي بسرعة .وضيفي معلقة قشطة أو مكعبين جبنة مثلثات في الأخر دة اللي بيدي طعم "غني" جدآ زي بشاميل المطاع الكبيرة…
رابعآ : تكات المعجنات والحلويات الهشة
لو الكيكة بتطلع غامقة أو بتهبط منك السر في " معلقة خل " ضيفي معلقة خل صغيرة مع بيض ، هي بتشتغل كمحسن طبيعي وبتخلي الكيكة هشة وبيضة جدآ من جوه . وفي المخبوزات ، عشان تفضل طرية لاطول فترة ، أول ماتطلع من الفرن رشيها ببخاخة مية خفيفة جدآ وغطيها بفوطة نظيفة لمدة 5 دقائق ، البخار هيخليها طرية زي القطن …
(الخاتمة)
في النهاية ، النفس الحلو في الأكل هو “حب” وإهتمام بالتفاصيل . لما بتطبخي ده ؟ الطبخ ممارسة وإستمرار وكل يوم هتتعلمي حاجة جديدة تخليكي ملكة في مطبخك . شاركونا في التعليقات : إية هي أكتر تكة بتعمليها وبتحلي طعم أكلك ؟
“ودايما خلي شعارك في المطبخ إنة الحب هو المكون السري لأي أكلة ناجحة،وبلهن والشفا لكل اللي هيجرب تكاتنا ”
