رز معمر بالطريقة المصرية بمقادير مضبوطه
هنعمل النهاردة طاجن الرز المعمر المالح أو الرز المنقوع في حليب بالطريقة المصرية بخطوات سهلة وبسيطة ومقادير مظبوطة مع شوية ملاحظات نركز فيها ، هيطلع احلي طاجن رز بالحليب ، اللي يجرب مش هيعمل الرز غير بالطريقة دي دائما ، خصوصا وقت العزومات ، طاجن يجنن في الطعم والشكل .
طاجن أساسي علي السفرة مع باقي الاصناف سواء عندك عزومه أو غدا يوم عادي ، وقيمته الغذائية عالية كمان ، وصفتنا اليوم غنية بالكربوهيدرات و الفيتامينات و المعادن و البروتينات ، يلا نجهز الطاجن و نبدأ بالمقادير بسرعة .
المقادير :
٢ كوب رز مصري مغسول و موضوع في مصفاه الرز
٣ كوب حليب بارد خالي من الدسم
٢ علبة زبادي /رايب حجم صغير
٢ ملعقة كبيرة زبدة
٢ ملعقه كبيرة قشطة
ملح حسب الرغبة (ملعقة صغيرة مش مليانه لكل كوب رز )
رشه سكر
الطريقة :_
١_ ندهن الطاجن سمنه ونضع الرز وفوقه اللبن والملح والسكر ونقلب كويس جدا عشان الملح يدوب في كل الرز و لا نجد جزء مالح و الاخر غير مالح .
٢_نقلب الزبادي/الرايب بشوكة ونوزعه علي وش الطاجن بالتساوي .
٣_نوزع القشطة علي وش الطاجن لأن القشطة هي اللي عندي الطاجن وش ذهبي جميل ونغطي الطاجن ونسيبه منقوع في اللبن وكل المقادير لمدة ساعة .
٤_نوزع الزبده علي وش الطاجن قبل دخول الفرن .
نيجي بقا التسويه مفيش اسهل منها : الفرن يكون شغال علي درجة حرارة ٢٢٠ و نحط الطاجن في ارضيه الفرن لحد ما الرز يتشرب اللبن و يغلي وبعد كدا نرفع الطاجن علي الشبكه اللي بتكون مثبتة في نص الفرن بالظبط عشان يكمل سوا لحد ما الطاجن وشه يحمر و كدا نكون خلصنا الوصفة وعملنا طاجن معمر يجنن وبالف هنا علي قلب كل من يأكل منه .
الطبق دا يتقدم مع اطباق تانية كتير اوي ، ممكن نقدمه مع الدجاج أو اللحمه أو الكفته أو البانيه وممكن نقدم جنبه شوربة أو صوص أو بطاطس مقلية ، بس بصراحة هو مش محتاج اضافات جنبه طعمه يجنن
اتمني تكون استفدت من مقالي و تجرب الطريقة و تقول رأيك وبالف هنا علي قلبك ،ولو في اي استفسار انا موجود .
