طريقة عمل ترايفل مانجو

مكونات كيك الفانيليا:

4 بيضات بحرارة الغرفة

180 جرام سكر

4 معالق كبيرة معيارية ماء مغلى

45 جرام زبدة

8 جرام بيكنج بودر 

140 جرام دقيق حلويات أو دقيق فاخر

40 جرام نشا

7 جرام فانيليا سكر أو سائلة

هنحتاج سيروب نشرب بيه الكيك مكوناته:

كوب عصير مانجو

نصف كوب حليب

مكونات الكريمة:

لتر حليب أربع أكواب من الحليب  

100 جرام سكر

5 معالق كبيرة كاسترد

نصف كوب حليب

2 باكيت كريم شانتيه + كوب حليب بارد جدا

نصف كوب عصير مانجو مركز

هنحتاج حبة مانجو مقطعة مكعبات صغيرة لوضعها بين الطبقات

طريقة التحضير:

علشان نحضر الكيك أول حاجه هنجيب المضرب الكهربائى ونضيف فيه البيض ونضربه كويس وأول ما يبدأ لونه يفتح وحجمه يتضاعف بزود الماء الساخن المغلى وبنزل عليهم بالسكر واضرب لمدة متقلش عن ١٠ دقايق وبعد ١٠ دقايق بضيف الدقيق المنخول والفايليا والبيكنج بودر والنشا بالتدريج على أربع مرات واضربهم بالمضرب اليدوى وأول ما الدقيق يختفي بزود المكون الأخير وهو الزبدة الدايبه وبقلبها مع الخليط وأول ما الزبدة تتحد مع الخليط بوقف تقليب علطول    ونجيب صينية مقاس ٢٣ سم قابلة للفتح نحط فيها ورقة زبدة ونصب فيها الخليط ونخبطها خبطتين كدا علشان ميكونش في فراغات فى الكيك ونجيب عود خشبى ونبدأ نلفه جوا الخليط فى حلقات علشان يمنع الكيك يتشقق ونحطها فى فرن مسخن مسبقا على حرارة ١٧٠ من فوق ومن تحت ونحطها فى الرف اللى فى النص لمدة تتراوح من ٤٠_٤٥ دقيقة وبعد ما نطلعه نسيبه يبرد تماما ماحاولت اطلعه واول ما يبرد الكيك بطلعه من الصينية وأقطعه مكعبات .

فى حلة على النار هنصب الحليب وعليه السكر ونقلبهم تقليبة مع بعض ونتأكد ان السكر داب وفى طبق على جنب هحط الكاسترد وازود عليه ربع كوب حليب واخلطهم كويس مع بعض واضيف الخليط على الحليب لما يقرب يسخن وهستمر بالتقليب على نار هاديه وأول ما الخليط يغلى ويعمل فقاعات كده هشيله من على النار.

علشان نحضر الكريم شانتيه هنحط بودرة الكريم شانتيه فى بولة وعليها كوب حليب بارد جدا ونضربهم بالمضرب الكهربائى الأول على سرعة هادية وبعدين على سرعة عالية  لمدة ٤ دقايق علشان يكون متماسك وهناخد نص كمية الكريم شانتيه ونضيفه على الكريمة المحضره فى الخطوه السابقة لحد ما يبقى لونه افتح وقوامه خفيف كده وهش. 

هنخلط كوب عصير مانجو مع نص كوب حليب علشان نعمل السيروب اللى هنشرب بيه الكيك.

هنجيب طبق التقديم أى طبق تحبوه بس يكون عالى نحط فيه طبقه خفيفة من الكريمة وعليها طبقة من الكيك وبعدين هنشرب الكيك بشوية سيروب وبغطيها بطبقة تانية من الكريمة فوقها شوية من مكعبات المانجو وعليها طبقة كيك ونشربها سيروب وبعدين نحط باقى كمية الكريمة اللى عندنا والكمية الباقية مت الكريم شانتيه هنزين بيها الكيك مع مكعبات مانجو واختيارى ممكن نحط بلوبيرى وفراولة .