وصفات هتعجبكم جدا شاورما الفراخ و الكومونبير و الناجتس

احلى الوصفات لست البيت جربوها تعجبكم جدا شاورما الفراخ البيتي أحلى من الجاهزة ولعشاق الكومونبير و  الناجتس البيتي المقرمش

الطريقه الاولى 👇 🫰 😍 

شاورما الفراخ البيتي أحلى من الجاهزة 😍🔥

المكونات:

 • 1 كيلو صدور فراخ مقطعة شرائح رفيعة

 • 2 معلقة كبيرة عصير ليمون

 • ملح حسب الرغبة

 • 1 معلقة كبيرة بهارات شاورما

 • 3 فصوص ثوم مفروم

الطريقة:

 1 نقطع صدور الفراخ شرايح رفيعة جدًا.

 2 نحط عليها الليمون والملح ونقلبهم كويس، ونسيبها منقوعة حوالي ساعة.

 3 نغسلها كويس من الليمون والملح، ونبدأ نحط التتبيلة: بهارات الشاورما والثوم المفروم، ونقلبها كويس لحد ما تتشرب التتبيلة.

 4 نحطها في طاسة سخنة (يفضل تيفال أو جريل) من غير زيت أو بزيت خفيف جدًا، ونقلب باستمرار لحد ما تستوي وتحمر.

تتقدم سخنة مع عيش شامي أو عيش سوري، ومعاها تومية أو طحينة وسلاطة 😋🥙

جربوها وقولولي رأيكم… وبالهنا والشفا ❤️ 

الطريقه الثانيه 🫰 👇 😍 

لعشاق الكومونبير 🧀❤

مقرمشة من بره وسيحة من جوه… متعة حقيقية! 😋🔥

المكونات:

 • 250 جرام جبنة كومونبير (ممكن نقطعها مثلثات أو مكعبات)

 • 1 كوب وربع دقيق

 • 2 بياض بيضة + 2 معلقة كبيرة مية

 • 1 ونص كوب بقسماط

 • نص معلقة صغيرة ثوم بودرة

 • نص معلقة صغيرة زعتر

 • نص معلقة صغيرة ملح

 • زيت غزير للقلي

الطريقة:

 1 في طبق، نخلط الدقيق مع الملح.

 2 في طبق تاني، نخلط البقسماط مع الزعتر والثوم البودر.

 3 نغمس قطع الكومونبير في الدقيق الأول، بعدين في بياض البيض والمية، وآخر خطوة في البقسماط المتبل.

 4 نرص القطع في صينية ونغطيها بكيس نايلون، وندخلها التلاجة نص ساعة علشان تمسك نفسها.

 5 نسخن الزيت على نار متوسطة، ونقلي الجبنة لحد ما تاخد لون دهبي حلو ومقرمش.

 6 نطلعها على ورق ماص، ونقدّمها سخنة بقى والجبنة سايحة من جوه 😍

تتقدم مع صوصات غموس زي الباربكيو أو التومية أو المايونيز بالثوم… وبالهنا❤

الطريقه الثالثه 👇 😍 🔥 

الناجتس البيتي المقرمش 💛👌

المكونات:

 • ٤ قطع توست أبيض (من غير الأطراف)

 • نص كيلو صدور فراخ بانيه (مخلي ومقطع)

 • ٢ بيضة

 • ملح + فلفل أسود

 • نص ملعقة صغيرة بابريكا

 • نص ملعقة صغيرة بصل بودرة

 • نص ملعقة صغيرة ثوم بودرة

 • فيجيتار كرسبي (أي نوع بتحبيه)

 • زيت للقلي

الطريقة:

 1 في الكبة، نضرب التوست مع الفراخ والتوابل (ملح، فلفل، بابريكا، بصل وثوم بودرة) لحد ما تبقى عجينة ناعمة.

 2 نفرد العجينة على سطح مدهون خفيف، على شكل مربع، ونقطعها لمربعات صغيرة شبه الناجتس.

 3 نحط المربعات دي في الفريزر ساعة علشان تشد.

 4 بعد الساعة، نطلعهم وندهنهم بالبيض، ونغلفهم بالفيجيتار.

 5 نرجعهم الفريزر ساعة كمان علشان يثبتوا قبل القلي.

 6 نسخن الزيت كويس، ونقلي الناجتس لحد ما ياخد لون دهبي ومقرمش.

 7 يتقدم سخن مع الكاتشب أو أي صوص بتحبيه.

وبس كده! أحلى ناجتس بيتي من غير مواد حافظة 😋