جرّبي 3 وصفات حلويات تخطف القلوب والأنظار
جرّبي 3 وصفات حلويات تخطف القلوب والأنظار الطريقه الاولى شوروز مقرمش من بره وطري من جوه 🧡 و جلاش بكريمة الكراميل 🧡 و بسكويت بالكريمة والشوكولاتة 💛
الطريقه الاولى 👇 🫰 😍
شوروز مقرمش من بره وطري من جوه 🧡
المقادير
لتحضير العجينة:
3 كوب دقيق
3 كوب ماء
1 بيضة
1 معلقة صغيرة فانيليا
3 معالق كبيرة زبدة
رشة ملح
لصوص الشوكولاتة:
2 معلقة كبيرة كاكاو
1 معلقة كبيرة حليب بودرة
1/2 معلقة صغيرة فانيليا
1/2 كوب ماء
للتزيين:
سكر بودرة
قرفة مطحونة (اختياري)
طريقة التحضير
• في حلة على النار نحط المية + الزبدة + الفانيليا + رشة ملح ونسيبهم يغلو.
• أول ما تغلي المية والزبدة تسيح، نشيل الحلة من على النار ونضيف الدقيق دفعة واحدة.
• نقلب بسرعة بمعلقة خشب لحد ما تبقى عجينة متماسكة وناعمة.
• نسيب العجينة تهدى 10 دقايق، وبعدين نضيف البيضة ونعجن كويس لحد ما تتجانس تمامًا.
• نحط العجينة في كيس حلواني بفوهة نجمة، ونشكّلها على شكل حلقات أو صوابع على ورق زبدة.
• نسخن الزيت ونقلي الشوروز لحد ما ياخد لون دهبي. نطلعه على ورق مطبخ.
• نرش عليه سكر بودرة مع قرفة حسب الرغبة.
تحضير الصوص:
• نخلط الكاكاو والحليب البودرة والفانيليا مع المية ونقلب كويس على البارد.
• نرفعهم على النار شوية بسيطة مع التقليب المستمر لحد ما الصوص يبقى ناعم ومتجانس.
بالهنا والشفا ♥️
الطريقه الثانيه 🫰 👇 😍
جلاش بكريمة الكراميل 🧡
المقادير:
لفة جلاش
1 كوب سمنة بلدي سايحة
نصف كوب فستق مفروم أو مكسرات حسب الرغبة
نوتيلا أو مربى حليب أو كراميل للتزيين
مقادير الشربات:
2 كوب سكر
1 كوب ميه
1 معلقة صغيرة عصير ليمون
مقادير كريمة الكراميل للوش:
1/2 كوب سكر
1 كوب كريمة طبخ أو كريمة خفق
1 معلقة كبيرة زبدة
طريقة الشربات:
• نحط السكر والمية على النار، ولما يبدأ يغلي نعد 7 دقايق.
• نضيف عصير الليمون ونسيبه يغلي غلوتين كمان، ونطفي ونسيبه يبرد تمامًا.
طريقة كريمة الكراميل:
• نحط السكر في طاسة على نار هادية ونسيبه لحد ما يدوب ويتكرمل من غير تقليب.
• نضيف الكريمة بالتدريج مع التقليب، وبعدين نحط الزبدة ونقلب لحد ما القوام يبقى ناعم.
• نسيبه يبرد شوية قبل الاستخدام عشان يتقل ويكون مناسب للتزيين.
طريقة التحضير:
• نقطع الجلاش نصفين بالطول.
• ناخد ورقة واحدة وندهنها سمنة، نطبقها على شكل مربع، وندهنها تاني.
• نلفها على عود شيش طاووق خشبي أو قلم رفيع، ونضغط برفق عليها ونخرجها، ونلفها على شكل دايرة.
• نرص الأساور في صينية مدهونة، وندهن الوش بالسمنة.
• ندخلها فرن سخن على 180 درجة لحد ما تاخد لون دهبي حلو.
• نطلعها من الفرن، ونسقيها بالشربات البارد على طول.
التزيين:
• نحط كريمة الكراميل في كيس حلواني بفوهة نجمة، ونزين نص كل قطعة بحركة دائرية من جوه لبرا.
• ممكن نحط بدل الكراميل نوتيلا أو مربى حليب حسب الرغبة.
بالهنا والشفا ♥️
الطريقه الثالثه
بسكويت بالكريمة والشوكولاتة 💛
المقادير:
250 جرام دقيق (حوالي 1 وثلث كوب)
75 جرام نشا (حوالي 1/2 كوب)
1/2 معلقة صغيرة ملح
3/4 معلقة صغيرة بيكنج بودر
150 جرام سكر بودرة (حوالي 1 كوب)
75 جرام سمنة (حوالي 1/3 كوب)
2 معلقة كبيرة زيت (حوالي 25 جرام)
1 بيضة
1/2 معلقة صغيرة فانيليا
4 معالق كبيرة حليب أو أكتر حسب احتياج العجينة
مقادير الحشو:
3/4 كوب أو أكتر سكر بودرة
1 معلقة كبيرة حليب بودرة (حوالي 25 جرام)
1/2 معلقة صغيرة فانيليا
عصير 1/2 ليمونة
قليل من الماء
طريقة التحضير:
• في بولة نخلط الدقيق والنشا والملح والبيكنج بودر والسكر البودرة ونقلب كويس.
• نحط السمنة والزيت في طاسة على النار لحد السمنة تسيح بس، من غير ما تسخن.
• نضيف السمنة الدافية على الدقيق ونفركهم باليد لحد القوام يبقى رملي.
• نضيف البيضة والفانيليا ونعجن بخفة، ولما تختفي البيضة نبدأ نضيف الحليب بالتدريج مع العجن لحد ما العجينة تلم وتبقى طرية ومتماسكة.
• نفرد العجينة بإيدينا على شكل مستطيل سُمكه 1 سم، نغطيه ونسيبه في التلاجة ساعة.
• بعد كده نحطه بين ورقتين زبدة ونفرده بالنشابة لسُمك 2 مللي.
• نقطع العجينة مربعات أو مستطيلات أو دواير حسب الرغبة.
• نعمل ثقوب بالشوكة في كل قطعة.
• نرص القطع على صاج فيه ورقة زبدة، وندخلها فرن سخن على 180 درجة لمدة 20 دقيقة تقريبًا.
• أول ما يطلع من الفرن هيكون طري، نسيبه يبرد وهيقرمش.
تحضير الحشو:
• نخلط السكر البودرة مع الحليب البودرة والفانيليا والليمون وشوية ميه صغيرين، ونعجن لحد ما يبقى قوامه متماسك ويتشكل.
• لو الخليط طري نزوّد سكر بودرة تدريجي لحد ما يشد.
• نغطي الحشو عشان ما ينشفش.
• ناخد قطعة حشو ونشكلها بنفس شكل البسكوت بس أصغر شوية، ونحطها بين قطعتين بسكوت ونضغط بخفة.
نحتفظ بيه في علبة محكمة الغلق، ويفضل مقرمش وطازة لأيام.
بالهنا والشفا ♥️
