5 مشروبات شتوية ساخنة وموفرة
السلام عليكم أتمنى إنه يكون يوم لطيف عليكم والكلام المعروف ده طبعًا خلينا ندخل في الموضوع مباشرةً.
حبيت أكتب لك المقالة دي اليوم؛ عشان تعرف إزاي تحضر مشروبات شتوية دافئة وساخنة ولا تنسى أن تكون موفرة ، بما أن في فصل الشتاء دخل.
طبعًا كنت أحب أقولك جيب مشروبك وركز معايا، ولكن لو كان معاك مشروب دافئ يحتويك في أجواء الشتاء مكنتش هتكون بتقرأ المقال ده دلوقتى.
متقلقش يا عزيزي هقولك على طرق تحضير شوية مشروبات ساخنة ولذيذة تنجو بيهم في فترة الشتاء البارد.
1- طريقة تحضير القهوة سريعة الذوبان
المكونات:
1- قهوة سريعة الذوبان
2- ماء مغلي
3- حليب دافئ (حسب الرغبة )
4- سكر (حسب الرغبة)
طريقة التحضير السحرية:
1- تجيب المج بتاعك الجميل أو أي كوب، تضيف تقريبًا ملعقة صغيرة من القهوة سريعة الذوبان (موجودة في أي سوبر ماركت أو اسأل عمك محمد)، وتضيف بعدها السكر حسب رغبتك.
2- لو حابب تعمل فوم أو رغوة زي الكافيهات هتضيف ملعقة صغيرة من الماء المغلي وتبدأ التقليب لمدة 3 أو 4 أو حتى 5 دقائق، وممكن بكل بساطة تشتري المضرب المخصص للرغوة وتريح نفسك.
3- وبعد ما تعمل الفوم أو الرغوة اللي تحبها تقدر تضيف الحليب الدافئ حسب رغبتك ولو مش عارف المقدار قد إيه تقدر تضيف ثلث المج حليب، مع العلم إنك لو مش حابب تضيفه مش هيكون في مشكلة.
4- وآخر خطوة تضيف الماء المغلي وتبدأ بالتقليب بهدوء عشان الفوم ميضعش.
واستمتع بمشروبك الدافئ في الليالي الشتوية الجميلة.
2- طريقة تحضير مشروب السحلب
المكونات:
1- مسحوق سحلب
2- سكر (حسب الرغبة)
3- ماء
4- حليب
طريقة تحضير مشروب السحلب:
1- لتحضير مج السحلب تضيف ملعقة كبيرة من مسحوق السحلب في الكنكة أو الوعاء على نار متوسطة.
2- تضيف ثلث الكمية ماء، وثلثي الكمية حليب، وتضيف سكر حسب رغبتك.
3- وكل اللي عليك تبدأ التقليب على نار متوسطة لحد ما يوصل للقوام اللي تحبه.
4- تقدر تضيف مكسرات لو تحب، بس خليك ناصح في الغالب في عبوات سحلب عند العطار جاهزة وبيبقى مضاف عليها مكسرات.
ومش هفكرك إن المشروب اللي اسمه سحلب ده أحد أفضل مشروبات الشتاء الساخنة اللي تخليك تستمتع في الليالي الباردة.
3- تحضير شراب الكاكاو بالحليب
المكونات:
1- مسحوق كاكاو
2- حليب
3- مياه
4- سكر (حسب الرغبة)
طريقة التحضير:
1- تضيف ملعقة صغيرة من مسحوق كاكاو داخل الكنكة أو وعاء التحضير، ويُفضل يكون كاكاو خام وفي العموم تقدر تضيف نصف ملعقة كمان لو تحب.
2- دلوقتي تضيف الحليب والسكر وطبعًا حسب رغبتك، لو مش عارف تضيف قد إيه من الحليب تقدر تضيف ثلث الكمية أو نصف الكمية حتى، وفي الآخر تضيف الماء.
3- تبدأ تقلب على نار متوسطة لحد ما المكونات تمتزج مع بعضها وتسيبها تغلي.
وبكده تكون حضرت شراب كاكاو ساخن لذيذ وكمان مناسب للأطفال وينفعك في فصل الشتاء.
ملحوظة قلبوظة: عشان المكونات تكون ممتزجة مع بعضها بشكل جيد، يُفضل إضافة الحليب والسكر ومسحوق الكاكاو وتقلبهم وتسيبهم يغلوا ولكن مع الملاحظة، وبعدها تضيف مقدار المياه وتسيبهم يغلوا لتاني مرة، وبكده مش هتلاقي الكاكاو مرقد معاك في المج وأنت بتشربه.
4- تحضير حمص الشام (حلبسة)
المكونات:
1- حمص شام حصى
2- حبة طماطم كبيرة
3- ملح وكمون
4- ليمون
5- شطة (حسب الرغبة)
6- مياه
طريقة تحضير ألذ مشروب شتوي (أكيد حمص الشام):
1- تنقع الحمص لمدة ساعة ساعتين أو حتى 3 ساعات مع التغيير المستمر للماء.
2- تبدأ تُضيف مياه كافية على نار عالية لحد ما تغلي وبعدها تُضيف الحمص وتسيبه يغلي من دقيقة لدقيقتين.
3- وبعد كده تحاول تتخلص من الماء وتضيف ماء جديدة ويكون مغلي.
4- سيبه يغلي دقيقة وبعدها تهدي النار وتخليها متوسطة.
5- تقدر دلوقتي تُضيف الكمون، وتعصر حبة الطماطم (ويُفضل تكون من غير قشرها).
6- وتبدأ تتابعه من وقت لآخر وممكن تضيف ماء مغلي لو حسيت إن الماء نقص بسبب الغليان.
7- لو اتضح معاك ان الحمص استوى تقدر تضيف الملح وترفعه من على النار.
8- أثناء التقديم تقدر تضيف الليمون والشطة حسب رغبتك.
5- مشروب الزنجبيل
المكونات:
1- زنجبيل
2- مياه
3- سكر (حسب الرغبة)
طريقة تحضير الزنجبيل:
1- تضيف الزنجبيل في الكوب بمقدار قليل وبحرص.
2- تضيف السكر (حسب الرغبة).
3- وتضيف الماء المغلي، وبكده يكون خلص تحضير الزنجبيل.
4- وتقدر تضيف قرفة لو تحب.
ملحوظة مهمة: الزنجبيل مشروب سهل وسريع وكمان يفيد الجسم لأنه يقوي المناعة، ولكنه مضر للأشخاص اللي بتعاني من التهاب في المعدة، وده سبب إضافة كمية قليلة، لأن الزنجبيل حَامٍ جِدًّا على المعدة.
أتمنى أكون قدرت أفيدك بطرق تحضير المشروبات الساخنة وطبعًا تفيد الجسم، واللي هتونسك في الليالي الشتوية الجميلة.
طبعًا أنا مش حابب أطول عليك أكتر، روح حضر مشروب شتوي يدفيك واحكيلي عن تجربتك في التعليقات.
