طريقة تحضير المكرونه البشاميل الجوسي اللذيذه
المكرونه البشاميل أكله بيحبها الصغار والكبار مين فينا مبيحبهاش ،يالا بينا نبدأ مع بعض وصفتنا وصدقوني هتدمنوها بالطريقه دي ودايما هتعتمدوها لتحضيرها
ودي طريقه سهله جدا وسريعه التحضير وهتتفاجئي من النتيجه وأد ايه هي طريه وجوسي
طريقه عمل عصاج اللحم :–
- المكونات:-
نص كيلو لحم أحمر مفروم
٢ بصله متوسطي الحجم
بهارات لحمه وملح وفلفل وكمون
مكعب زبده
الطريقه :-
نقوم بتقطيع البصل مكعبات صغيره مع مكعب زبده علي النار لحد ماتصفر وبعد كده ننزل باللحم ونضيف التوابل بتاعتنا ونهدي عليها النار لحد السوا
بعد كده نطفي عليها ونسبها تهدي
طريقه عمل البشاميل:–
المكونات :-
٥ مكعبات زبده
دقيق
لتر لبن
كوبين شوربه
جبنه موتزاريلا
ملح وفلفل
طريقه التحضير :–
في قدر علي النار هتنزل بالزبده لحد ماتسيح وبعد كده ننزل بالدقيق واحده واحده ونفضل نقلب فيه لحد مايكون لونه اصفر وريحته تظهربسيط منسبهوش يتحرق وبعد كده نزود اللبن والشوربة تدريجي ونضيف الجبنه الموتزاريلا ونفضل نقلب فيه بالمصري لحد مايلف وبعد كده نزود ملح حسب الرغبه ورشه فلفل ونطفي عليه النار ونسيبه يهدي شوية
في وعاء به ماء مغلي علي النار به ذره ملح وقليل من الزيت ننزل بالمكرونه بتاعتنا ونسيبها تتسلق ومنسويهاش اوي يعني تكون علي وشك السوا
في وعاء نخلط نصف كميه البشاميل مع المكرونه بتاعتنا كلها
ونجهز صينيه بيركس أو تيفال وبعدين نحط نص كميه المكرونه ونرصها كويس وبعدين ننزل فوقها عصاج اللحم ونفرده كويس علي المكرونه وفوقها ننزل بباقي المكرونه وعالوش نحط باقي البشاميل وممكن علي الوش تزودي جبنه موتزاريلا هتخليها تحفه
نسخن الفرن بتاعنا لمده ١٠ دقائق وبعدين نهديه وبعدين ندخل صينيه المكرونه الفرن علي نار هاديه ٢٠ دقيقه وبعد كده نفتح عليها الشوايه لحد ماوشها يحمر والجبنه الموتزاريلا تسيح
ولما تخرج من الفرن نسيبها تهدي شويه قبل التقطيع ونقطعها مكعبات ونقدمها مع سلطه طماطم وكاتشب ومخلل وبطاطس محمرة أو مع بانيه أو قطع استربس أو برجر زي ما أولادنا ييفضلوها صدقوني هيحبوها أوي وهيطلبوها منك دايما
وكمان هي وجبه غذائيه متكامله و مغذيه جدا فيها نشويات وبروتين وفيتامينات فالسلطه يعني كل العناصر الغذائيه اللي جسم طفلك محتاجها
وبالهنا والشفا ومتنسوش تدعولي
