طريقتين لعمل الكشك المصري

الكشك..اختلفت الطرق اللي بيتعمل بيه الكشك سواء برز ولبن او بزبادي وفيه طرق تانيه له..لكن اليكي احسن واسهل طريقتين لعمله 

• الطريقة الاولى
• المقادير:
• نص كوب رز مصري مغسول 
• ٢ ونص كوب شوربة فراخ او ميه مدوب فيها مكعب مرقه
• ١ كيلو من اللبن البلدي مغلي او لتر من اللبن المبستر(عن تجربة اللبن البلدي المغلي بيعطي قوام وطعم اكتر من رائع) ونص كوباية تترك على جنب
• ملح وفلفل 
• بصله متقطعه جوليان 
• سمنه لتحمير البصله او زبدة
• معلقتين دقيق
• الطريقة:
• ١_نضع الرز مع الشوربة في حله ونتركه على نار هاديه لحد ما الرز يستوي تماما ويشرب الشوربة
• ٢_ نضع اللبن المغلي على الرز ونقلبهم كويس مع بعض ونضبط الملح والفلفل
• ٣_نحط الدقيق على نص كوباية اللبن الزيادة ونقلبهم كويس مع بعض ونحطهم على الكشك ونقلبهم كويس لحد ما نحس انهم تقلوا مع بعض
• ٤_نسيح سمنه في طاسه وننزل عليها بالبصل الجوليان ونحمرهم لحد ما يوصل للون البني
• ٥_نصفي السمنه على الكشك ونقلبها كويس معاه لحد ما يمتزجوا سوا
• ٦_نقدم الكشك متزين بالبصل الجوليان المتحمر

ممكن تناول النوع دا من الكشك بالمعلقة او بالعيش

• الطريقة الثانية 
• المقادير:
• ١ كوب زبادي كبير
• كوب ونص شوربة او مكعب مرقة متدوب في كوباية مية مغليه
• ٢ ملعقة دقيق
• معلقة سمنه كبيرة + ملعقة اخري لتحمير البصل 
• بصل متقطع جوليان وبصله متقطعه مكعبات 
• الطريقة:
• ١_نحط السمنة في حلة ونحمر فيها البصلة المكعبات لحد ما لونها يبقي شفاف ونحط عليها الدقيق ونحمره لحد ما لونه يبقي اصفر
• ٢_في بولة نخلط الزبادي مع الشوربة كويس ونحطه على خليط الدقيق والبصل ونقلبهم كويس بالمضرب السلك لحد ما يتجانسوا كويس مع بعض ونسيبهم على نار هاديه لحد ما يتقلوا 
• ٣_لما يتقلوا نضبط الملح والفلفل
• ٤_نحمر البصله الجوليان مع السمنة ونقدم الكشك متزين بالبصل بس من غير ما نخلط السمنة مع الكشك المرة دي 
•  
• من طرق تقديم النوع دا من الكشك للناس اللي بتحب الاختراعات ممكن نقدمه مع عيش متقطع و متحمر ومتقطع عليه مكعبات فراخ مسلوقه وعند التقديم نحط عليهم الكشك، او ممكن تقليب الفراخ المتقطعه مع الكشك نفسه قبل التقديم